[ទីផ្សារបរទេស] កាលពីឆ្នាំ២០២១ នៅក្នុងកម្មវិធីតាំងបង្ហាញរថយន្តក្រុង Munich នៃប្រទេសអាល្លឺម៉ង់ ក្រុមហ៊ុន BMW បានបង្ហាញចេញរថយន្ត iX5 Hydrogen ដែលជាប្រភេទរថយន្ត X5 ប្រើប្រាស់ថាមពលអ៉ីដ្រូហ្សែន។ ពេលនេះដែរ តាមការចុះផ្សាយរបស់ Nikkei Asia បានឲ្យដឹងការផលិតរថយន្តអ៉ីដ្រូហ្សែនទ្រង់ទ្រាយធំរបស់ BMW អាចនឹងកើតមានឡើងក្នុងពេលប៉ុន្មានឆ្នាំខាងមុខ។
ប្រធានផ្នែកលក់ឈ្មោះ Peter Nota ប្រចាំនៅក្រុមហ៊ុន BMW បានប្រាប់ដល់ Nikkei Asia ថាការលក់រថយន្តអ៉ីដ្រូហ្សែនរបស់ BMW អាចនឹងចាប់ផ្ដើមចាប់បំផុតនៅឆ្នាំ២០២៥។ លោកបានឲ្យតម្រុយដែរថារថយន្តដំបូងទំនងជាប្រភេទ SUV ដោយសាររថយន្តនេះមានប្រជាប្រិយភាពខ្លាំង។
មិនតែប៉ុណ្ណោះ ការចុះផ្សាយរបស់ប្រភពដដែលបានលើកឡើងថារថយន្តអ៉ីដ្រូហ្សែនរបស់ BMW នឹងត្រូវរួមអភិវឌ្ឍន៍ជាមួយក្រុមហ៊ុន Toyota ដែលជាក្រុមហ៊ុនមានទំនាក់ទំនងជាមួយ BMW រួចស្រាប់ ហើយ Toyota ក៏មានបទពិសោធន៍ផលិតរថយន្តអ៉ីដ្រូហ្សែនផងដែរគឺរថយន្ត Toyota Mirai។
លោក Peter Nota បានសម្លឹងមើលឃើញថារថយន្តអ៉ីដ្រូហ្សែនគឺជាដំណោះស្រាយមួយក្នុងការដោះស្រាយបញ្ហាដែលរថយន្តអគ្គិសនីកំពុងប្រឈមមុខនាពេលបច្ចុប្បន្ន ជាពិសេសគឺសមត្ថភាពក្នុងការសាកបំពេញថាមពលដែលប្រើប្រាស់ពេលខ្លី និងសមត្ថភាពជួយថែរក្សាបរិស្ថានផងដែរ៕
