ក្រុមហ៊ុន BMW បានត្រៀមខ្លួនរួចជាស្រេចសម្រាប់ការកើនឡើងនៃចំនួនលក់រថយន្តអគ្គិសនីរបស់ខ្លួន ជាមួយការបញ្ជាទិញនូវកញ្ចប់អាគុយសម្រាប់ម៉ូឌែលរថយន្ត i4, iX និងរថយន្តអគ្គិសនីដែលគ្រោងបង្ហាញចេញនាឆ្នាំ២០២៤ខាងមុខផងដែរ។
ក្នុងបទសម្ភាសន៍ជាមួយ Bloomberg នាពេលថ្មីៗនេះ នាយកប្រតិបត្តិក្រុមហ៊ុន BMW លោក Oliver Zipse បានបង្ហាញថាក្រុមហ៊ុនខ្លួនឥឡូវនេះមានកិច្ចសន្យាផលិតអាគុយសរុបជាង ២០ ពាន់លានអឺរ៉ូ (ប្រហែល ២៤ ពាន់លានដុល្លារ) ដែលកើនឡើងពីតម្លៃ ១២ ពាន់លានផោន (១៤,២ ពាន់លានដុល្លារ) ពីមុន។ ជាមួយការបញ្ជាទិញកញ្ចប់អាគុយថ្មីរបស់ BMW ត្រូវបានទទួលបានពីក្រុមហ៊ុនចិន Contemporary Amperex Technology, EVE Energy កូរ៉េខាងត្បូង Samsung SDI និង Northvolt AB របស់ប្រទេសស៊ុយអ៊ែត។
ជាក់ស្តែងម៉ូឌែលរថយន្តអគ្គិសនីដែលទទួលបានការអភិវឌ្ឍន៍គឺ iX3 ឆ្នាំ២០២២ ដែលកំពុងបង្ហាញវត្តមាននៅក្នុងកម្មវិធីតាំងបង្ហាញរថយន្តទីក្រុងម៉ូនិច ដែលដំណើរការដោយម៉ូទ័រអគ្គិសនីចំនួនមួយ នៅខាងក្រោយ អាចផលិតកម្លាំងបាន ២៨២សេះ និងអាចស្ទុះពីល្បឿន ០-១០០គ.ម/ម ប្រើពេល ៦,៨វិនាទី និងមានល្បឿនអតិបរមា ១៨០គ.ម/ម៕
