រថយន្ត Bugatti ជាច្រើនគ្រឿងត្រូវបានហៅវិលចូលរោងចក្រវិញ នៅឯអាមេរិកខាងជើង ដោយសារតែបញ្ហា Software ដែលអាចធ្វើឲ្យប៉ះពាល់ដល់មុខងារទប់លំនឹង Electronic Stability Control (ESC) របស់វា។
នៅក្នុងការសង្ខេបការហៅចូលវិញនេះ រដ្ឋបាល National Highway Traffic Safety Administration បានកត់សម្គាល់ថា “បន្ទាប់ពីបញ្ឆេះរួចហើយ មុខងារ ESC មិនបានត្រលប់ទៅ បើកដំណើរការពេញលេញដោយស្វ័យប្រវត្តិ វិញនោះទេ ប្រសិនបើអ្នកបើកបរបានជ្រើសរើស Handling Mode នៅលើកុងតាក់ Drive Mode”។
ជាលទ្ធផល រថយន្ត Chiron, Chiron Sport និង Divo មិនបានគោរពតាមស្តង់ដារ Federal Motor Vehicle Safety Standard #126 of ‘Electronic Stability Control Systems’ ឡើយ។ គ្រប់ម៉ូដែលទាំង ៣ ដែលផលិតកាលពីប៉ុន្មានខែចុងក្រោយ ទទួលបានការអាប់ដេត Software ស្របពេលដែលក្រុមហ៊ុនរថយន្តបារាំងនេះ បានរកឃើញពីបញ្ហានៅដើមឆ្នាំកន្លងទៅ។
ទោះជាយ៉ាងណា រថយន្តចំនួន ៧៩គ្រឿង មានភាគរយជួបបញ្ហាដល់ទៅ ១០០% ឯណោះ ដែលត្រូវការការជួសជុល។ ក្នុងនោះ រថយន្ត Chiron ផលិតចាប់ពីថ្ងៃទី២១ ខែធ្នូ ឆ្នាំ២០១៧ ដល់ ថ្ងៃទី២១ ខែកញ្ញា ឆ្នាំ២០២០, រថយន្ត Chiron Sport ផលិតចាប់ពីថ្ងៃទី២៨ ខែវិច្ឆិកា ឆ្នាំ២០១៨ ដល់ ថ្ងៃទី២១ ខែកញ្ញា ឆ្នាំ២០២០ និង រថយន្ត Divo ផលិតចាប់ពីថ្ងៃទី២៤ ខែកក្កដា ដល់ ថ្ងៃទី២៩ ខែតុលា ឆ្នាំ២០២០៕
