[ទីផ្សារបរទេស] នៅថ្ងៃស្អែកនេះរថយន្ត Purosangue ដែលជារថយន្ត SUV ដំបូងរបស់ Ferrari នឹងបង្ហាញវត្តមានជាផ្លូវការនៅថ្ងៃទី១៣ ខែកញ្ញា ខណៈដែលប្រភេទគំរូនៃរថយន្តនេះត្រូវបានប្រទះឃើញបើកបរលើដងផ្លូវជាលើកចុងក្រោយ។
Purosangue ដែលបានប្រទះឃើញនៅតែមានការបិទបាំងរូបរាងដែលទំនងជារូបរាងនៃផលិតផលសម្រេចចុងក្រោយ ប៉ុន្តែគេនៅតែអាចមើលឃើញថារថយន្តនេះ មិនដូចជារថយន្ត SUV ទូទៅឡើយ។ វាមានរូបរាងស្រដៀងនឹងរថយន្ត Hatchback ទំហំធំ អមជាមួយបំពង់ស៊ីមាំងចំនួនបួន ខណៈដែលមានលាក់ម៉ាស៊ីន១២ស៊ីឡាំង នៅផ្នែកខាងមុខ។
ពេលប្រកាសចេញជាផ្លូវការ Purosangue នឹងក្លាយជាគូប្រជែងដ៏ខ្លាំងក្លារបស់រថយន្ត Lamborghini Urus Performante, Bentley Bentayga Speed និង Aston Martin DBX707។ ផ្អែកតាមអ្វីដែលបានដឹងកន្លងមក គឺរថយន្ត Purosangue នឹងប្រើប្រព័ន្ធបើកបរប៉ុងពីរ ជាមួយបូមខ្យល់ និងប្រអប់លេខស្វ័យប្រវត្តិ។
សម្រាប់ម៉ាស៊ីនវិញ បានបញ្ជាក់ថាជាម៉ាស៊ីន ១២ស៊ីឡាំង ប៉ុន្តែ Ferrari ទំនងជាមានផែនការផ្ដល់ជូនជម្រើស Hybrid មួយទៀត ដោយសារគ្រោងឆ្អឹងដែលប្រើលើ Purosangue បានឌីហ្សាញឡើងដោយគិតគូរដល់ថាមពលអគ្គិសនី។ ជាមួយ Purosangue នេះដែរ Ferrari គ្រោងផលិតមិនឲ្យលើសពី ២០% ឡើយនៃទំហំផលិតសរុបរបស់ក្រុមហ៊ុន ដើម្បីធ្វើឲ្យវាក្លាយជារថយន្តកម្រ និងផ្ដាច់មុខបំផុតមួយ៕
