ក្រុមហ៊ុនផលិតរថយន្តអគ្គិសនីអាមេរិក Fisker បានដាក់បង្ហាញនូវរថយន្ត Fisker Ocean ដែលជាប្រភេទ SUV អគ្គិសនីជាផ្លូវការ នៅក្នុងកម្មវីធី LA Auto Show ដោយក្រុមហ៊ុនរំពឹងថា វានឹងចេញលក់នៅថ្ងៃទី១៧ ខែវិច្ឆិកា ឆ្នាំ២០២២ តែម្តង។
រថយន្តអគ្គិសនី Fisker Ocean នឹងមានតម្លៃចាប់ពី ៣៧ ៤៩៩ដុល្លារ នៅលើសហរដ្ឋអាមេរិក។ ក្រុមហ៊ុនខាងលើក៏ផ្តល់ជម្រើសម៉ូដែលផ្សេងទៀត ដូចជា Fisker Ocean Ultra តម្លៃចាប់ពី ៤៩ ៩៩៩ដុល្លារ និង Fisker Ocean Extreme តម្លៃចាប់ពី ៦៨ ៩៩៩ដុល្លារ។
មិនតែប៉ុណ្ណោះ រថយន្ត Fisker Ocean ចំនួន ៥ពាន់គ្រឿងដំបូង នឹងត្រូវហៅឈ្មោះថា Fisker Ocean One ហើយនឹងដាក់លក់ក្នុងតម្លៃចាប់ពី ៦៨ ៩៩៩ដុល្លារ។
រថយន្ត SUV អគ្គិសនីខាងលើមានចម្ងាយបើកបរ ៤០០គីឡូម៉ែត្រនៅពេលសាកភ្លើងពេញម្តង ខណៈប្រភេទប្រើម៉ូទ័រអគ្គិសនីមួយគ្រឿង បង្កើតកម្លាំងបាន ២៧៥សេះ។ វាក៏មានប្រភេទចម្ងាយឆ្ងាយ ៥៥០គីឡូម៉ែត្រ និងប្រើម៉ូទ័រអគ្គិសនី ២ គ្រឿង បង្កើតកម្លាំងបាន ៥៤០សេះ។
ដោយឡែក ចំពោះម៉ូដែល Ocean Extreme និង Ocean One នឹងមានចម្ងាយបើកបរ ៥៦០គីឡូម៉ែត្រ ហើយមានកម្លាំង ៥៥០សេះ៕
