[ទីផ្សារបរទេស] ក្រុមហ៊ុនផលិតរថយន្ត GAC បានធ្វើការប្រកាសដាក់លក់ជាផ្លូវការនូវរថយន្តអគ្គិសនីសុទ្ធ GAC Aion UT EV ស៊េរីថ្មីចុងក្រោយ ជាមួយតម្លៃលក់ចាប់ពី ៩ ៦០០ ដុល្លារ ដល់ ១៤ ០០០ ដុល្លារ នៅក្នុងទីផ្សារប្រទេសចិន។
GAC Aion UT ដំណើរការដោយម៉ូទ័រអគ្គិសនីចំនួន ១ ប៉ុង ១ FWD អាចផលិតកម្លាំងបាន ១៣៤ សេះ ផ្គួបជាមួយជម្រើសអាគុយទំហំ ៣៤ និង ៤៤ គីឡូវ៉ាត់ម៉ោង អាចបើកបរបានចម្ងាយ ៣៣០ និង ៤២០ គីឡូវ៉ាត់ម៉ោង នៅពេលសាកថ្មពេញម្តង គាំទ្រការសាកថ្មល្បឿនលឿន អាចសាកបានពី ៣០ ទៅ ៨០ភាគរយ ប្រើរយៈពេលខ្ទង់ ២៤នាទីប៉ុណ្ណោះ។
រថយន្តនេះ មានប្រវែងតួខ្លួនសរុប ៤ ២៧០ ម.ម ទទឹង ១ ៨៥០ ម.ម កម្ពស់ ១ ៥៧៥ ម.ម និងប្រវែងគម្លាតកង់មុខ-ក្រោយ ២ ៧៥០ ម.ម ។ សម្រាប់រូបរាង និងការឌីស្សាញរបស់ GAC Aion UT មានលក្ខណៈបែបស្ព័រ ជាមួយប៉ាណាមុខបិទជិត ចង្កៀងមុខ-ក្រោយ LED ចំនួន ១៩ គ្រាប់ រាងអក្សរ D និង C ព្រមទាំងប្រើប្រាស់នូវថាសកង់ស្ព័រទំហំ ១៦ និង ១៧អ៊ីញ ជាដើម និងជម្រើសពណ៌ក្រហម ប្រាក់ ស ត្នោតខ្ចី ស្វាយ និងបៃតង។
ចំពោះនៅផ្នែកខាងក្នុងវិញ មានការឌីស្សាញបែប minimalistic ទទួលបានកុងទ័រព៌ត័មានឌីជីថលទំហំ ៨,៨អ៊ីញ និងអេក្រង់កម្សាន្ត touchscreen ទំហំ ១៤,៦អ៊ីញ សម្រាប់បញ្ជាមុខងារទូទៅនៅលើរថយន្ត ក៏ដូចជាកន្លែងសាកថ្មឥតខ្សែ ដំបូល panoramic sunroof និងប្រព័ន្ធ ADAS ដ៏ឆ្លាតវៃជាច្រើនមុខងារផងដែរ៕
