[ទីផ្សារបរទេស] ក្រុមហ៊ុនផលិតរថយន្ត Geely បានធ្វើការប្រកាសដាក់លក់ជាផ្លូវការនូវរថយន្ត Geely Galaxy LEVC L380 “Land Airbus” ប្រភេទ MPV អគ្គិសនីសុទ្ធ ៦កៅអី ជាមួយតម្លៃលក់ចាប់ពី ៤៧ ០០០ ដុល្លារ និង ៦៩ ០០០ ដុល្លារ។
រថយន្តនេះ មានប្រវែងសរុប ៥ ៣១៦ ម.ម ទទឹង ១ ៩៩៨ ម.ម កម្ពស់ ១ ៩៤០ ម.ម និងប្រវែងគម្លាតកង់មុខ-ក្រោយ ៣ ១៨៥ ម.ម ដំណើរការដោយ៖
- ម៉ូទ័រអគ្គិសនីចំនួន ១ ប៉ុង ១ FWD អាចផលិតកម្លាំងបានចំនួន ២៦៨ សេះ ផ្គួបជាមួយអាគុយទំហំ ១០០ និង ១៤០ គីឡូវ៉ាត់ម៉ោង អាចបើកបរបានចម្ងាយ ៥៧០ និង ៨២៥ គីឡូម៉ែត្រ នៅពេលសាកថ្មពេញម្តង និងគាំទ្រការសាកថ្មល្បឿនលឿន DC ដោយសាក ៣០%-៨០% ប្រើរយៈពេល ៣០ នាទី ប៉ុណ្ណោះ។
- ម៉ូទ័រអគ្គិសនីចំនួន ២ ប៉ុង ២ AWD អាចផលិតកម្លាំងបានសរុបចំនួន ៥៣៦ សេះ ផ្គួបជាមួយអាគុយទំហំ ១១៦ និង ១៤០ គីឡូវ៉ាត់ម៉ោង អាចបើកបរបានចម្ងាយ ៦៥០ និង ៨០៥ គីឡូម៉ែត្រ នៅពេលសាកថ្មពេញម្តង និងគាំទ្រការសាកថ្មល្បឿនលឿន DC ដោយសាក ៣០%-៨០% ប្រើរយៈពេល ៣០ នាទី ប៉ុណ្ណោះ។
សម្រាប់ផ្នែកខាងក្រៅ ត្រូវបានរចនាជាមួយប៉ាណាបិទជិត ចង្កៀងមុខ-ក្រោយ LED អូសពីម្ខាងទៅម្ខាង ព្រមទាំងប្រើប្រាស់នូវទ្វាររូតចំហៀងអគ្គិសនី ព្រមទាំងថាសកង់ស្ព័រ។
ចំពោះនៅផ្នែកខាងក្នុងវិញ ទទួលបានកុងទ័រឌីជីថលទំហំ ១០,២៥ អ៊ីញ និងអេក្រង់កំសាន្ត touchscreen ទំហំ ១៥,៤ អ៊ីញ ក៏ដូចជាអេក្រង់ HUD ទំហំ ១៩,៨ អ៊ីញ អេក្រង់កំសាន្ត touchscreen ទំហំ ១២,៨ និង ៥,៩៨ អ៊ីញ នៅផ្នែកខាងក្រោយដំបូល panoramic sunroof កន្លែងសាកថ្មឥតខ្សែកម្លាំង ៥០វ៉ាត់ និងប្រព័ន្ធ ADAS ឆ្លាតវៃជាច្រើនមុខងារ៕
