នៅថ្ងៃទី ៩ ខែឧសភា ក្រុមហ៊ុន Geely បានដាក់លក់រថយន្តប្រភេទ sedan plug-in hybrid ម៉ូដែល Starshine 8 ក្រោមម៉ាកយីហោ Geely Galaxy ក្នុងតម្លៃចាប់ពី ១២៥ ៨០០ ដល់ ១៦៥ ៨០០ យ័ន ស្មើនិង ១៧ ៤០០ ទៅ ២២ ៩០០ដុល្លារជាមួយជម្រើសរយៈចម្ងាយបើកបរសរុប (comprehensive range) ពីរគឺចម្ងាយ ១,៥០០ គីឡូម៉ែត្រ និង ១,៦០០ គីឡូម៉ែត្រ។
រថយន្តថ្មីនេះ ដំណើរការដោយប្រព័ន្ធ (plug-in hybrid) ដែលមានឈ្មោះថា NordThor ជាបច្ចេកវិទ្យាជំនាន់ចុងក្រោយ អភិវឌ្ឍដោយក្រុមហ៊ុន Geely ផ្ទាល់ មានសមត្ថភាពអាចបើកបរដោយប្រើថាមពលអគ្គិសនីសុទ្ធបានចម្ងាយ ៦០គីឡូម៉ែត្រ និង ១៣០ គីឡូម៉ែត្រ គិតតាមស្តង់ដារវាស់ចម្ងាយ CLTC។ រថយន្ដនេះក៏បានបំពាក់ដោយប្រព័ន្ធជំនួយការបើកបរវៃឆ្លាត G-Pilot។
រថយន្ដ Geely Galaxy Starshine 8 ដំណើរការជាមួយប្រព័ន្ធ plug-in hybrid NordThor ជាមួយជម្រើស២ផ្សេងគ្នាក្នុងនោះមាន EM-i និង EM-P។
ប្រព័ន្ធ EM-P: ដំណើរការដោយម៉ាស៊ីនចំណុះ ១.៥ អាចផលិតកម្លាំង ១៦១សេះ និងកម្លាំងរមួល ២៥៥ញ៉ូតុនម៉ែត្រ ផ្គួបជាមួយម៉ូទ័រអគ្គិសនីដែលមានកម្លាំង ២១៥សេះ និងកម្លាំងរមួល ៣៥០ញ៉ូតុនម៉ែត្រ។ ពេលម៉ាសុីនសាំងនិងម៉ូទ័រអគ្គិសនីដំណើរការរួមគ្នាអាចផលិតកម្លាំងបាន ៣៧៥សេះ និងកម្លាំងរមួល ៦០៥ញ៉ូតុនម៉ែត្រ។
ប្រព័ន្ធ EM-i: ដំណើរការដោយម៉ាស៊ីនចំណុះ ១.៥ អាចចផលិតកម្លាំង ១១០សេះ និងម៉ូទ័រអគ្គិសនីមួយ ដោយភ្ជាប់ជាមួយប្រអប់លេខ DHT។ រថយន្ដបំពាក់មកជាមួយអាគុយប្រភេទ លីចូម-ដែក-ហ្វូស្វាត (Lithium Iron Phosphate – LFP) ទំហំ ១៨.៤ kWh បើកបរបានចម្ងាយ ១៣០គីឡូម៉ែត្រ អគ្គិសនីសុទ្ធ។
Geely Galaxy Starshine 8 មានប្រវែងតួខ្លួនសរុប ៥ ០១៨មម ទទឹង ១ ៩១៨មម កម្ពស់ ១ ៤៨០មម និងមានប្រវែងគម្លាតកង់មុខក្រោយ ២ ៩២៨មម។ លក្ខណៈពិសេសរថយន្ដនេះគឺបំពាក់មកជាមួយដៃទ្វារាបស្មើ (Hidden Door Handles), ទ្វារគ្មានស៊ុមកញ្ចប់ (Frameless Windows), ចង្កៀងមុខរាងស្រឡូន (Slender Headlights), ចង្កៀងក្រោយរចនាអូសជាបន្ទាត់ភ្ជាប់មកជាមួយ Logo Geely នៅចំកណ្ដាល និងរូបរាងបែប Fastback និងប្រើកង់យ៉ាន់ទំហំ ១៩ អុីញ។
បន្ថែមពីនេះទៀត Galaxy Starshine 8 ក៏បំពាក់មកជាមួយ Lidar នៅលើដំបូលខាងមុខ និងកាមេរ៉ាចំនួន ១០គ្រាប់គាំទ្រដល់ប្រព័ន្ធបើកបរវៃឆ្លាត G-Pilot (ឈ្មោះជាភាសាចិន Qianli Haohan) ។ ប្រព័ន្ធបើកបរវៃឆ្លាត G-Pilot មានច្រើនកម្រិតដូចជា H1, H3, H5, H7, និង H9។ ចំពោះកម្រិតខ្ពស់បំផុត H9 នឹងផ្ដល់នូវមុខងារនាំផ្លូវដោយស្វ័យប្រវត្តិ (Navigation on Autopilot) ទាំងក្នុងទីក្រុង និងលើផ្លូវហាយវេ ព្រមទាំងប្រព័ន្ធជំនួយក្នុងការចូលចត បើតាមការអះអាងរបស់ Geely។
នៅផ្នែកខាងក្នុងបានបំពាក់ចង្កូតបែបស្ព័រ មានអេក្រង់កម្សាន្ដទំហំ ១៥.៤ អុីញ។ ចំពោះប្រព័ន្ធប្រតិបត្តិការនៅផ្នែកខាងក្នុងដំណើរការប្រព័ន្ធ Flyme Auto ដែលអាចប្រើប្រាស់ការបញ្ជាដោយសំឡេងតាមរយៈប្រព័ន្ធបញ្ញាសិប្បនិម្មិត AI។ បន្ថែមពីនេះ Geely Galaxy Starshine 8 បំពាក់មកជាមួយឧបករណណ៍បំពងសម្លេងចំនួន២៣គ្រាប់និងសាកថ្មឥតខ្សែកម្លាំង 40W ចំនួន២។
អ្វីដែលកាន់តែពិសេសរថយន្ដក៏បំពាក់មកជានួយដំបូលកញ្ចក់បែប Panoramic ទំហំ ១.៣៦ ម៉ែត្រការ៉េ ខណៈកៅអីអ្នករួមដំណើរខាងមុខ (co-pilot seat) មានមុខងារកាច់ឲ្យរាបស្មើបាន ១៨០ដឺក្រេ អាចគេងបានយ៉ាងងាយស្រួល៕
