រថយន្ត Honda CR-V 2026 ថ្វីបើរក្សារូបរាងនៅដដែល ប៉ុន្តែបានផ្លាស់ប្តូរប្រភេទម៉ាស៊ីន ដែលកន្លងមកមានជម្រើសប្រើសាំងសុទ្ធ ពេលនេះសម្រាប់ស៊េរីថ្មី គឺមកតែជាមួយប្រភេទ Hybrid ប៉ុណ្ណោះ សម្រាប់ទីផ្សារតំបន់អាស៊ាន។ ការមកតែជាមួយជម្រើស Hybrid មានគោលដៅចំពោះអតិថិជនដែលបើកបរច្រើនក្នុងក្រុង និងការសន្សំសំចៃ។
រថយន្ត e:HEV Hybrid ថ្មីនេះ បំពាក់ម៉ាស៊ីនសាំង Atkinson Cycle ចំណុះ ២,០លីត្រ ជាមួយម៉ូទ័រអគ្គិសនី ២ ដែលផលិតបានកម្លាំងសរុប ២០៧សេះ និងកម្លាំងរមួល ៣៣៥ញូវតុនម៉ែត្រ។ ម៉ាស៊ីននេះ ដំណើរការជាមួយប្រព័ន្ធប្រអប់លេខ e-CVT មានជម្រើសប៉ុង១ និងប៉ុង២ ហើយរួមបញ្ចូលគ្នាជាមួយប្រព័ន្ធគ្រប់គ្រងលំនឹងនៅផ្លូវកោង ឬផ្លូវបត់ E-DPS។
សម្រាប់ប៉ុង១ រថយន្ត CR-V នេះ មានកម្រិតប្រើប្រាស់សាំងជាមធ្យមប្រហែល ៥លីត្រប៉ុណ្ណោះ ក្នុង១០០គីឡូម៉ែត្រ។ អ្នកបើកបរ អាចផ្លាស់ប្តូរម៉ូដចំនួន ៣ តាមស្ថានភាពផ្លូវ ដូចជា Engine Drive, Hybrid Drive និង EV Drive។
នៅក្នុងផ្នែកកាប៊ីន រថយន្ត SUV Hybrid នេះ បំពាក់ប្រព័ន្ធ Honda Connect, មុខងារចាក់សោរឌីជីថល, កាមេរ៉ា ៣៦០ដឺក្រេ, មុខងារចូលចត, កុងទ័រឌីជីថល ១០,២អ៊ីញ, Speaker BOSE និងមានប្រព័ន្ធសុវត្ថិភាពមួយចំនួន ក្នុងនោះរួមមាន Blind Spot ផងដែរ៕
