[ទីផ្សារចិន] ក្រុមហ៊ុនផលិតរថយន្ត Hongqi បានធ្វើការប្រកាសចេញនូវរថយន្ត Hongqi Tiangong 05 ប្រភេទ sedan ៥កៅអី ប្រើប្រាស់អគ្គិសនីសុទ្ធ ដែលជារថយន្ត sedan ទីមួយ និងម៉ូដែលទី ២ នៅក្នុងត្រកូល Tiangong របស់ Hongqi ហើយការបង្ហាញខ្លួនជាផ្លូវការត្រូវបានគេរំពឹងថានឹងធ្វើឡើងនៅក្នុងថ្ងៃបុណ្យចូលឆ្នាំថ្មីខាងមុខនេះនៅក្នុងប្រទេសចិន ខណៈតម្លៃលក់ខាងក្រុមហ៊ុនមិនទាន់បង្ហាញចេញនូវឡើយទេ។
រថយន្ត Hongqi Tiangong 05 មានប្រវែងសរុប ៤ ៨២០ ម.ម កម្ពស់ ១ ៤៨០ ម.ម ទទឹង ១ ៩១៥ ម.ម និងប្រវែងគម្លាតកង់ ២ ៩០០ ម.ម ដំណើរការដោយម៉ូទ័រអគ្គិសនីចំនួន ១ ប៉ុង ១ អាចផលិតកម្លាំងបាន ២៨២ សេះ ផ្គួបជាមួយជម្រើសអាគុយចំនួន ២ អាចបើកបរបានចម្ងាយ ៥៥០ និង ៧៥០ គីឡូម៉ែត្រ នៅពេលសាកថ្មពេញម្តង។
សម្រាប់ការឌីស្សាញផ្នែកខាងក្រៅ ទទួលបានការឌីស្សាញថ្មីបែបស្ព័រជាមួយប៉ាណាបិតជិត ចង្កៀងមុខ LED រាងស្លីម និងចង្កៀងក្រោយ LED រាងអក្សរ X ព្រមទាំងប្រើប្រាស់នូវថាសកង់ស្ព័រទំហំ ១៨ អ៊ីញ។
ចំពោះនៅផ្នែកខាងក្នុងវិញ មានការរចនាជាមួយពណ៌ទឹកក្រូចដិតជាមួយនឹងសម្ភារៈកម្រិតខ្ពស់ រួមបញ្ចូលអេក្រង់លើកញ្ជក់ AR-HUD ទំហំ ៦៥ អ៊ីញ អេក្រង់កំសាន្ត touchscreen ទំហំធំ កន្លែងសាកឥតខ្សែកម្លាំង ៥០វ៉ាត់ និងប្រព័ន្ធជំនួយការអ្នកបើកបរផ្សេងៗជាដើម៕
