[ទីផ្សារបរទេស] ការចំណេញប្រាក់ពីប្រតិបត្តិការនៅក្រុមហ៊ុន Hyundai Motors នៅឆ្នាំ២០២២នេះ រំពឹងថានឹងមានដល់ខ្ទង់ប្រមាណ ៧,៧ពាន់លានដុល្លារ ដែលជាប្រាក់ចំណេញច្រើនមិនធ្លាប់មានក្នុងប្រវត្តិសាស្ត្ររបស់ក្រុមហ៊ុន។
អ្នកព្យាករណ៍ដើមឡើយបានរំពឹងថាប្រាក់ចំណេញរបស់ Hyundai នឹងមានប្រមាណ ៦,៦ពាន់លានដុល្លារ សម្រាប់ឆ្នាំ២០២២នេះ ប៉ុន្តែគេបានបង្កើនតួលេខដល់ប្រមាណ ៧,៧ពាន់លានដុល្លារ វិញ។ តួលេខថ្មីនេះគឺជាការកើនឡើង ៥១,៩% ធៀបនឹងប្រាក់ចំណេញដែលរកបានកាលពីឆ្នាំ២០២១ ហើយការបង្កើនតួលេខនេះគឺបន្ទាប់ពីលទ្ធផលប្រចាំត្រីមាសទីពីររបស់ Hyundai គឺល្អខ្លាំងលើសការរំពឹង។
ជាក់ស្ដែងប្រាក់ចំណេញរបស់ Hyundai នៅត្រីមាសទីពីរនៃឆ្នាំ២០២២នេះ មានរហូតដល់ប្រមាណ ២,២ពាន់លានដុល្លារ កើនឡើងពីប្រមាណ ១,៤៦ពាន់លានដុល្លារ ដែលរកបានកាលពីត្រីមាសទីមួយកន្លងទៅ។
ការកើនឡើងនៃប្រាក់ចំណេញនេះ ទទួលបានជម្រុញពីការលក់របស់ Hyundai នៅទូទាំងអឺរ៉ុប និងនៅអាមេរិកខាងជើង ដែលការលក់នៅទីផ្សារទាំងពីរមានកំណើន ២,៩% និង ៦,៦% ធៀបនឹងត្រីមាសទីពីរនៃឆ្នាំ២០២១៕
