[បរទេស] ក្រុមហ៊ុនផលិតរថយន្ត Hyundai បានធ្វើការដាក់បង្ហាញចេញនៅរថយន្ត Hyundai Nexo ជំនាន់ថ្មី ស៊េរីឆ្នាំ ២០២៥ ប្រភេទ Compact-SUV ប្រើថាមពលចំហាយទឹក hydrogen (FCEV) នៅឯពិព័រណ៍រថយន្ត Seoul Mobility Show 2025 ដែលកំពុងធ្វើឡើងនៅប្រទេសកូរ៉េខាងត្បូង ។
Hyundai Nexo ជំនាន់ទី ២ នេះ ដំណើរការដោយថាមពលអ៊ីដ្រូសែន hydrogen fuel cell មានកម្លាំង ១៤៧ សេះ អបដោយម៉ូទ័រអគ្គិសនីចំនួន ១ មានកម្លាំង ២០១ សេះ មានអាគុយទំហំ ២,៦៤ គីឡូវ៉ាត់ម៉ោង រួមទាំងធុងផ្ទុកអ៊ីដ្រូសែន ៦,៦៩គីឡូក្រាម អាចបើកបរបានចម្ងាយ ៧០០គីឡូម៉ែត្រ និងប្រើពេលតែ ៥នាទីប៉ុណ្ណោះ ក្នុងចាក់បញ្ចូលប្រេងអ៊ីដ្រូសែនឡើងវិញ ព្រមទាំងប្រព័ន្ធផ្ទេរថាមពល V2L ទៀតផង ។
សម្រាប់រូបរាង និងការឌីស្សាញផ្នែកខាងក្រៅ ត្រូវបានយកលំនាំចេញពីម៉ូដែល Hyundai Palisade ជំនាន់ថ្មី ជាមួយរូបរាងបែបជ្រុង ដែលការឌីស្សាញនេះឲ្យឈ្មោះថា Hyundai Art of Steel មានចង្កៀងមុខ-ក្រោយ LED បែប Futuristic កញ្ចក់ចំហៀងប្រភេទកាមេរ៉ាឌីជីថលជាដើម ។
ចំពោះនៅផ្នែកខាងក្នុងមានកុងទ័របង្ហាញព័ត៌មានឌីជីថល និងអេក្រង់កំសាន្ត touchscreen ជាប្រភេទអេក្រង់ភ្លោះទំហំ ១២,៣អ៉ីញដូចគ្នា អាចប្រើមុខងារ Apple CarPlay/Android Auto រួមទាំងកុងទ័របង្ហាញលើកញ្ចក់ HUD ទំហំ ១២,៣ អ៉ីញ កន្លែងសាកថ្មឥតប្រើខ្សែ ដំបូលកញ្ចក់ panoramic glass roof និងឧបករណ៍បំពងសំឡេងម៉ាក B&O ១៤ ចំនុចផងដែរ ៕
