ក្រុមហ៊ុន Kia និងក្រុមហ៊ុនមេ Hyundai Motor Group បានឆ្មក់យកអតីតបុគ្គលិកជាច្រើនរូបនាមួយរយៈចុងក្រោយនេះ មានដូចជាអ្នកឌីហ្សាញឈ្មោះ Karim Habib និងប្រធានផ្នែកវិស្វករនៅ BMW M ឈ្មោះ Albert Biermann ជាដើម។
ចុងក្រោយនេះគឺគេអូសទាញបានអតីតបុគ្គលិក BMW ម្នាក់ទៀតគឺ Jochen Paesen ដែលថ្មីៗនេះលោកកាន់តួនាទីជាអ្នកចាត់ការការឌីហ្សាញផ្នែកខាងឲ្យក្រុមហ៊ុនរថយន្ត NIO។ មុនចូលធ្វើការនៅ NIO លោកធ្លាប់ធ្វើការនៅ Volkswagen ហើយជាអ្នកចូលរួមឌីហ្សាញផ្នែកខាងក្នុងនៃរថយន្តភីកអាប់ Amarok។
យ៉ាងណាក្ដី Paesen គឺត្រូវបានគេស្គាល់តាមរយៈស្នាដៃលេចធ្លោដែលមាននៅ BMW ដែលលោកបានធ្វើជាមេផ្នែកឌីហ្សាញសម្រាប់រថយន្ត Vision Efficient Dynamics Concept និងធ្វើការលើ 6-Series ផងដែរ។ បន្ថែមពីនេះ Paesen ធ្លាប់ជាប្រធានផ្នែកឌីហ្សាញផ្ទៃខាងក្នុងសម្រាប់ BMW I និងមេដឹកនាំគម្រោងការឌីហ្សាញផ្នែកខាងក្នុងសម្រាប់ BMW 7-Series និង M4 GTS ផងដែរ។
ចូលធ្វើការនៅ Kia លោក Paesen នឹងកាន់មុខតំណែងជាអនុប្រធាននៃក្រុមឌីហ្សាញផ្ទៃខាងក្នុង និងតាំងមូលដ្ឋាននៅ Kia Design Center នាទីក្រុង Namyang ប្រទេសកូរ៉េខាងត្បូង៕
