Lamborghini ចេញឡាន Huracan EVO ថ្មី ប្រើប៉ុងមួយ តែអះអាងថាសប្បាយបើកជាងមុន

Lamborghini បានបញ្ចេញរថយន្តស្ព័រម៉ូដែលថ្មីមួយទៀតហៅថា Huracan EVO RWD ដែលប្រើប្រព័ន្ធបើកបរប៉ុងមួយវិលកង់ក្រោយ។

ក្រុមហ៊ុនរថយន្តស្ព័រអ៊ីតាលីខាងលើអះអាងថា Huracan EVO RWD នឹងផ្តល់បទពិសោធន៍បើកបរកាន់តែអស្ចារ្យ និងសប្បាយជាង រថយន្ត Huracan EVO AWD ដែលប្រើប៉ុងពីរទៅទៀត។

ពាណិជ្ជកម្ម

រថយន្ត Huracan EVO RWD បំពាក់ម៉ាស៊ីនចំណុះ ៥,២លីត្រ Naturally-aspirated ទំហំ ១០ស៊ីឡាំង មានកម្លាំង ៦០២សេះ ហើយប្រើប្រអប់លេខ dual-clutch ៧វគ្គ និងមានមុខងារ Launch Control។ វាអាចជាន់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេល ៣,៣វិនាទី ហើយមានល្បឿនអតិបរមា ៣២៥គីឡូម៉ែត្រក្នុងមួយម៉ោង។

ថ្វីបើវាស្ទុះយឺតជាង Huracan EVO AWD ប៉ុន្តែ Lamborghini អះអាងថា Huracan EVO RWD ត្រូវបានបង្កើតឡើងដើម្បីឲ្យការបើកបរ កាន់តែសប្បាយ ទាំងលើផ្លូវសើម និងផ្លូវស្ងួត។ ក្នុងនោះវាបានបំពាក់ប្រព័ន្ធទប់លំនឹង Performance Traction Control System (P-TCS) ផងដែរ។

សូមបញ្ជាក់ថា រថយន្ត Lamborghini Huracan EVO RWD នេះត្រូវបានដាក់លក់ក្នុងតម្លៃចាប់ពី ២០៨ ៥៧០ដុល្លារលើទីផ្សារសហរដ្ឋអាមេរិក៕

Sponsored