[បរទេស] គិតត្រឹមរយៈពេល ៩ខែដំបូងនៃឆ្នាំ ២០២២ ក្រុមហ៊ុនផលិតរថយន្តដ៏ប្រណិត Lamborghini លក់បានរថយន្តចំនួន ៧ ៤៣០ គ្រឿងកើនឡើង ៨% បើធៀបនឹងរយៈពេលដូចគ្នាកាលពីឆ្នាំមុន។ ដូច្នេះហើយ ក្រុមហ៊ុនទើបតែសម្រេចចិត្តផលិតម៉ូដែលទី៤ ដើរដោយថាមពលអគ្គិសនីសុទ្ធ បន្ទាប់ពី Aventador, Huracan និង Urus ។
យោងតាមក្រុមហ៊ុន Auto Motor Sport បានឲ្យដឹងថា ថ្វីត្បិតតែមិនមានឈ្មោះផ្លូវការក៏ដោយ ក៏វាទំនងជាម៉ូដែលនេះជាមួយនឹងការរចនាម៉ូដ coupé 2+2 ដ៏ទំនើប និងដំណើរការដោយអគ្គិសនីសុទ្ធ។ រថយន្តនេះនឹងត្រូវផលិតឡើងនៅលើគ្រោងឆ្អឹង SSP platform ថ្មីទាំងស្រុងដែលត្រូវបានបង្កើតឡើងដោយក្រុមហ៊ុន Volkswagen Group ។
គ្រោងឆ្អឹងនេះនឹងត្រូវបានប្រើប្រាស់ដោយ Lamborghini និង Porsche, Rimac ។ ដូចការរំពឹងទុក ម៉ូដែលអគ្គិសនីសុទ្ធរបស់ Lamborghini នឹងមានល្បឿនរហូតដល់ ៦០០ គីឡូម៉ែត្រ និងបង្កើនល្បឿនពី ០-១០០ គីឡូម៉ែត្រ/ម៉ោង ក្នុងរយៈពេលប្រហែល ៣ វិនាទី។
គំនិតនៃការផលិតរថយន្តប្រភេទ grand touring របស់ Lamborghini មិនមែនជារឿងថ្មីនោះទេ។ ដោយរថយន្តប្រភេទ grand touring ដំបូងគេរគឺ 400 GT ដែលផលិតក្នុងចំនួន ២៥០ គ្រឿងនៅចន្លោះឆ្នាំ ១៩៦៦ និង ១៩៦៨ ។ ដោយផ្អែកលើម៉ូដែលនេះ Lamborghini បានផលិតម៉ូដែលបន្ថែមទៀតរួមមាន Islero, Espada, Jarama និង Urraco ដោយម៉ូដែលទាំងអស់នេះប្រើម៉ាស៊ីនចំណុះ ៣,៩ លីត្រ V12 លើកលែងតែម៉ូដែល Urraco។
ជាមួយគ្នានេះ ក្នុងកិច្ចសន្ទនាជាមួយគេហទំព័រ Zing news ក្នុងឱកាសដែល Lamborghini សម្ពោធរថយន្ត Huracan Tecnica នៅលើទីផ្សារប្រទេសវៀតណាម លោក Francesco Scardaoni នាយកប្រតិបត្តិនៃក្រុមហ៊ុន Lamborghini ប្រចាំតំបន់អាស៊ីប៉ាស៊ីហ្វិក ក៏បានបញ្ជាក់ដែរថា នៅឆ្នាំ ២០២៨ ក្រុមហ៊ុនផលិតរថយន្តអ៊ីតាលីនឹងចេញលក់រថយន្ត Supercar អគ្គិសនី៕
