រយៈពេល២ខែចាប់តាំងពីពេលប្រកាសចេញជាផ្លូវការជាលក្ខណៈសកលលោកមក រថយន្ត Toyota Land Cruiser ជំនាន់ថ្មី អាចទទួលបានការកុម្ម៉ង់ទិញជាង ២ម៉ឺនគ្រឿងនៅទីផ្សារប្រទេសជប៉ុន ខណៈដែលចំនួនផលិតរថយន្តនេះនៅជប៉ុនជាប្រចាំឆ្នាំគឺមានត្រឹម ៥ពាន់គ្រឿងប៉ុណ្ណោះ។
ក្រោយការផ្ទុះការកុម្ម៉ង់ទិញនេះ Toyota បានប្រកាសផ្អាកទទួលការកុម្ម៉ងទិញរថយន្ត Land Cruiser ជំនាន់ថ្មីរហូតដល់ថ្ងៃទី០១ ខែសីហា ឆ្នាំ២០២១។ Toyota ទំនងជានឹងពិចារណាបង្កើនចំនួនផលិតរថយន្តនេះ ដើម្បីបំពេញតាមតម្រូវការអតិថិជនដែលបន្តកើនឡើងឥតឈប់។
ទន្ទឹមនឹងនេះដែរ មានការលេចឭជាដំណឹងថា Toyota បានសុំឲ្យអតិថិជននៅពេលដែលទិញរថយន្ត Land Cruiser ជំនាន់ថ្មី គឺត្រូវចុះហត្ថលេខាលើកិច្ចព្រមព្រៀងមួយដែលសន្យាថាមិនលក់រថយន្តចេញនៅក្នុងពេលយ៉ាងតិចមួយឆ្នាំ ដែលធ្វើបែបនេះគឺដើម្បីទប់ស្កាត់មិនឲ្យមាន បុគ្គលមួយចំនួនកេងចំណេញក្នុងការទិញហើយ លក់រថយន្តនេះវិញដើម្បីរកលុយចំណេញ៕
