ក្រុមហ៊ុន Lexus បានបន្ថែមម៉ូដែលថ្មីសម្រាប់ត្រកូល RX ឆ្នាំ២០២២ របស់ខ្លួន គឺ Black Tourer និង Elegant Tourer សម្រាប់ទីផ្សារប្រទេសជប៉ុន។
រថយន្ត Lexus RX450h/RX300 Black Tourer មានបំពាក់ប៉ាណាមុខពណ៌ខ្មៅ, កាងមុខខាងក្រោមពណ៌ខ្មៅ, យ៉ាន់កង់ពណ៌ខ្មៅទំហំ ២០អ៊ីញ, ត្រឡោកកញ្ចក់ពណ៌ខ្មៅ និង កាងក្រោយពណ៌ខ្មៅ ផងដែរ។
ចំណែកឯផ្នែកខាងក្នុងវិញ ម៉ូដែល RX Black Tourer បំពាក់ពូកស្បែក, ដៃចង្កូតស្បែក និង ចង្កឹះលេខស្រោបស្បែក រំលេចដោយថ្នេរដេរពណ៌ទឹកប្រាក់ ទៀតផង។
រថយន្តនេះត្រូវបានដាក់លក់ក្នុងតម្លៃ ៥៥ ២៩៥ដុល្លារ សម្រាប់ម៉ូដែល RX300 FWD ប្រើម៉ាស៊ីនសាំងចំណុះ ២,០លីត្រ និង ៦៧ ៦៧០ដុល្លារ សម្រាប់ម៉ូដែល RX450h AWD ប្រើម៉ាស៊ីនសាំងចំណុះ ៣,៥លីត្រ។
ដោយឡែក សម្រាប់ម៉ូដែល Elegant Tourer វិញ បំពាក់ប៉ាណាមុខពណ៌ទឹកប្រាក់, កាងមុខខាងក្រោមពណ៌ខ្មៅ, យ៉ាន់កង់ទំហំ ២០អ៊ីញ និង ត្រឡោកកញ្ចក់ពណ៌ខ្មៅ។ ចំណែកឯកាប៊ីនខាងក្នុង វាប្រើពណ៌ត្នោត រំលេចដោយថ្នេរដេរពណ៌ទឹកប្រាក់។ ម៉ូដែលនេះត្រូវបានដាក់លក់ក្នុងតម្លៃ ៥៥ ៣១៥ដុល្លារ សម្រាប់ RX300 FWD ប្រើម៉ាស៊ីនសាំងចំណុះ ២,០លីត្រ និង ៦៧ ៧០០ដុល្លារ សម្រាប់ RX450h AWD៕
