[ទីផ្សារបរទេស] ក្រុមហ៊ុន Lexus បានធ្វើការអាប់ដេតរថយន្ត SUV តូចជាងគេរបស់ខ្លួនគឺម៉ូដែល UX ស៊េរីឆ្នាំ២០២៣ ដោយមានបំពាក់នូវប្រព័ន្ធ Infotainment ជំនាន់ចុងក្រោយ និងបច្ចេកវិទ្យា ADAS មកជាមួយ F Sport ដែលមានរចនាបថថ្មី ប៉ុន្តែនៅទីផ្សារសហរដ្ឋអាមេរិក រថយន្តនេះនឹងមានតែជម្រើសម៉ាស៊ីន Hybrid UX 250h តែប៉ុណ្ណោះ។
ប្រព័ន្ធ Infotainment ថ្មីលើរថយន្ត UX មានមកជាស្តង់ដារនូវអេក្រង់ ៨អ៉ីញ ឬក៏អាចជ្រើសរើសប្រភេទអេក្រង់ ១២,៣អ៉ីញ ដែលប្រព័ន្ធថ្មីនេះមានកម្រិតបង្ហាញច្បាស់ជាងមុន និងមានមុខងារតភ្ជាប់ច្រើនជាងមុន រួមមានមុខងារ Apple CarPlay, Android Auto និងជំនួយការសំឡេងថ្មី។ ដុំ Console នៅចំកណ្ដាលបានផ្លាស់ប្ដូរការឌីហ្សាញបន្តិចបន្តួច ដោយមានកន្លែងសាកថ្មទូរសព្ទធំជាងមុន, មានភ្លើង LED ហើយមានរន្ធ USB ចំនួនពីរ។
សម្រាប់បច្ចេកវិទ្យា ADAS វិញ រថយន្ត UX មានបំពាក់នូវប្រព័ន្ធ Lexus Safety System+ 2.5 ដូចដែលមានប្រើលើរថយន្ត NX។ វាមានមកជាស្តង់ដារសម្រាប់រថយន្តស៊េរីឆ្នាំ២០២៣ ដែលមានមុខងារដូចជា Dynamic Radar Cruise Control ជាមួយមុខងារ curve speed-control, Emergency Steering Assist, Lane Tracing Assist, និងមុខងារ Pre-Collision System ដែលមានសមត្ថភាពប្រសើរជាងមុន។
គួរដឹងថាប្រភេទម៉ាស៊ីនតែមានតែមួយជម្រើសសម្រាប់ទីផ្សារអាមេរិកគឺជា UX 250h ដែលមានផ្គួបផ្សំម៉ាស៊ីនចំណុះ ២,០លីត្រ ជាមួយម៉ូទ័រអគ្គិសនីចំនួនពីរ អាចផលិតកម្លាំងបាន ១៨១សេះ។ ការលក់រថយន្តនេះនឹងចាប់ផ្ដើមនៅអំឡុងត្រីមាសទីបីនៃឆ្នាំ២០២២ ជាមួយតម្លៃនឹងប្រកាសចេញពេលក្រោយ៕
