Lexus បានបញ្ចេញលក់រថយន្ត UX 250h ថ្មីមួយប្រភេទទៀតសម្រាប់ទីផ្សារចក្រភពអង់គ្លេស ដែលគេបានឲ្យឈ្មោះថា Premium Sport Edition។
រថយន្តប្រភេទថ្មីនេះគឺផលិតឡើងផ្អែកលើប្រភេទ UX Premium Pack ដែលវាមានប្រើប្រាស់ផ្ទាំងប៉ាណាពណ៌ខ្មៅ, ស៊ុមកញ្ចក់មើលចំហៀងពណ៌ខ្មៅ, ដៃលើដំបូលពណ៌ខ្មៅ និងប្រើប្រាស់យ៉ាន់កង់ទំហំ ១៨អ៊ីញ។
នៅផ្នែកខាងក្នុងក៏មានរំលេចការឌីហ្សាញយ៉ាងទាក់ភ្នែកផងដែរ ហើយវាមានបំពាក់ដោយអេក្រង់បង្ហាញទំហំ ៧អ៊ីញ ដែលមានមុខងារ Apple CarPlay និងមុខងារ Android Auto សម្រាប់ប្រើជាមួយស្មាតហ្វូន, មានកាមេរ៉ាមើលក្រោយ, មានប្រព័ន្ធ Intelligent Clearance Sonar, មានកញ្ចក់មើលក្រោយដែលប្ដូរកម្រិតពន្លឺ, មានកៅអីកម្ដៅ និងមានកញ្ចក់ខ្មៅសម្រាប់ការពារភាពឯកជននៅផ្នែកខាងក្រោយ។
រថយន្តនេះក៏មានមកជាស្តង់ដារនូវ Lexus Safety System+ ហើយវាមានប្រើប្រាស់ប្រព័ន្ធម៉ាស៊ីន Hybrid ដែលប្រើម៉ាស៊ីនសាំងចំណុះ ២,០លីត្រ ៤ស៊ីឡាំង ជាមួយម៉ូទ័រអគ្គិសនីដែលអាចជ្រើសរើសយកមួយ ឬពីរ ដែលអាចផលិតកម្លាំងបាន ១៨១សេះ ដូចគ្នា។
Lexus UX 250h Premium Sport Edition មានលក់នៅចក្រភពអង់គ្លេសក្នុងតម្លៃចាប់ពីប្រមាណ ៤៤ ៣៤៣ដុល្លារ ដែលថ្លៃជាងប្រភេទ Premium Pack ប្រមាណ ១ ១៣៧ដុល្លារ ប៉ុណ្ណោះ៕
