រថយន្ត Lexus RX450h+ plug-in hybrid ស៊េរីឆ្នាំ ២០២៦ នឹងបន្ថែមជាមួយជម្រើសម៉ូឌែល១ទៀត ដោយរក្សាការឌីស្សាញដូចទៅហ្នឹងម៉ូឌែល RX450h+ Luxury ប៉ុន្តែមានតម្លៃធូរថ្លៃជាងមុនជិត២មុឺនដុល្លារ។ ទោះបីស្ថិតនៅលំដាប់ក្រោមម៉ូឌែល RX450h+ Sports Luxury ដែលមានស្រាប់ពិតមែន ប៉ុន្តែម៉ូឌែលថ្មី RX450h+ Luxury PHEV គឺទំនើបជាងម៉ូឌែលធម្មតាពីមុនដែលប្រើប្រាស់ប្រព័ន្ធថាមល Hybrid ។
មូលហេតុនៃការសម្រេចចេញនូវម៉ូឌែលថ្មីនេះគឺដោយសារក្រុមហ៊ុន Lexus បានមើលពីតម្រូវការរបស់អតិថិជនភាគច្រើនចូលចិត្តរថយន្ដប្រើប្រាស់ប្រព័ន្ធថាមពល Plug-in Hybrid បើតាមទិន្នន័យបង្ហាញថាពីក្រុមហ៊ុន Lexus អតិថិជនជាង ៨០% លែងចង់ប្រើម៉ាស៊ីនសាំងសុទ្ធទៀតហើយ គឺពួកគេងាកមកប្រើ Hybrid ឬ Plug-in Hybrid វិញ។
ជាមួយគ្នានេះរថយន្ដ Lexus RX450h+ Luxury PHEV បានបំពាក់មកជាមួយអាគុយទំហំ ១៨.១ គីឡូវ៉ាត់ម៉ោង (18.1kWh) អនុញ្ញាតឲ្យរថយន្តនេះអាចបើកបរដោយប្រើថាមពលអគ្គិសនីសុទ្ធបានចម្ងាយ ៨៥ គីឡូម៉ែត្រ (តាមការអះអាងរបស់ក្រុមហ៊ុន) គឺវាស្មើនឹងសមត្ថភាពរបស់ម៉ូឌែល RX450h Sports Luxury ។
បន្ថែមពីនេះវាក៏ភ្ជាប់ជាមួយកញ្ចប់ជម្រើសបន្ថែម (Enhancement pack) ដែលមាននៅលើរថយន្ត RX350h Luxury ដូចជា៖ ការតុបតែងដោយស្បែក, ប្រព័ន្ធចងចាំទីតាំងកៅអីអ្នកបើកបរ និងមុខងារចេញ-ចូលរថយន្តដោយងាយស្រួល, កៅអីមុខមានខ្យល់ត្រជាក់, ដំបូលកញ្ចក់, ប្រព័ន្ធបង្ហាញព័ត៌មានលើកញ្ចក់មុខ (Head-up display) និងប៊ូតុងបញ្ជានៅលើចង្កូតបែប Touch ត្រូវបានដាក់បញ្ចូលមកជា ឧបករណ៍ស្តង់ដារ តែម្តងសម្រាប់ម៉ូដែល RX450h+ Luxury នេះ៕
