កាលពីពេលថ្មីៗកន្លងទៅនេះ Mazda បានបញ្ចេញរថយន្តអគ្គិសនីដំបូងបង្អស់របស់ខ្លួន ម៉ូដែល MX-30 ដែលប្រើកញ្ចប់អាគុយកម្លាំងត្រឹម ៣៥,៥គីឡូវ៉ាត់ម៉ោងប៉ុណ្ណោះ ស្របពេលដែលក្រុមហ៊ុនដទៃទៀតប្រើកញ្ចប់អាគុយធំជាងនេះឆ្ងាយ។
យោងតាមប្រធានផ្នែកស្រាវជ្រាវរបស់ក្រុមហ៊ុន Mazda លោក Christian Schultze បានឲ្យដឹងថា ការប្រើប្រាស់កញ្ចប់អាគុយតូចបែបនេះ គឺដើម្បីជួយដល់ផែនដី។
លោក Christian បានប្រាប់គេហទំព័រ Automotive News ថា កញ្ចប់អាគុយតូច គឺជាទំហំសមល្មមចំពោះការបំភាយឧស្ម័យកាបូនិក (CO2 emission) ដោយក្នុងនោះគិតទាំងការផលិត និងការប្រើប្រាស់ថាមពល។ ផ្ទុយទៅវិញ រថយន្តអគ្គិសនីប្រភេទ Long-range នឹងបំពុលដល់បរិស្ថានខ្លាំង។
មិនតែប៉ុណ្ណោះ ក្រុមហ៊ុន Mazda បានអះអាងថា កញ្ចប់អាគុយកម្លាំង ៩៥គីឡូវ៉ាត់ម៉ោង (មានបំពាក់លើ Tesla Model S និង Model X) នឹងតម្រូវឲ្យមានការបំភាយខ្លាំង។ លើសពីនេះទៅទៀត វានឹងកាន់តែអាក្រក់លើសដើម នៅពេលអ្នកផ្លាស់ប្តូរកញ្ចប់អាគុយថ្មី ក្រោយប្រើរួច ១៦០ ០០០គីឡូម៉ែត្រ (ឬ ១០០ ០០០ម៉ាយ៍)៕
