[ទីផ្សារបរទេស] កាលពីខែកក្កដា ឆ្នាំ២០២១ ក្រុមហ៊ុន Mercedes បានបង្ហាញអំពីគោលបំណងប្រែខ្លួនជាក្រុមហ៊ុនផលិតរថយន្តអគ្គិសនីសុទ្ធនៅត្រឹមឆ្នាំ២០៣០។
យ៉ាងណាក្ដី នៅចុងក្រោយ Mercedes បានលើកឡើងថាគោលបំណងនេះអាចសម្រេចអាស្រ័យលើស្ថានភាពទីផ្សារនីមួយៗតែប៉ុណ្ណោះ។ នេះមានន័យថារថយន្តម៉ាស៊ីនពីស្តុងនឹងត្រូវចូលនិវត្តន៍នៅក្នុងតំបន់មួយចំនួន ប៉ុន្តែវានឹងមានលក់នៅតាមបណ្ដាប្រទេសដទៃទៀតក្នុងពិភពលោក។
បន្ថែមពីនេះ រថយន្តម៉ាស៊ីនពីស្តុងនេះ នឹងមិនមែនតែជារថយន្តម៉ាស៊ីនតូចនោះទេ ព្រោះថា Mercedes ប្ដេជ្ញាថារក្សាទុកម៉ាស៊ីន V8 ឲ្យនៅមានជីវិតរហូតដល់ឆ្នាំ២០៣០ និងបន្តកាន់តែវែងអន្លាយតទៀត។ ក្នុងកិច្ចសម្ភាសន៍ជាមួយទស្សនាវដ្ដីអូស្ត្រាលី CarSale អនុប្រធានផ្នែកអភិវឌ្ឍន៍រថយន្តលោក Joerg Bartels និយាយថាម៉ាស៊ីន V8 នឹងបន្តមានជីវិតរស់រាន។
អនុប្រធានរូបនេះបានពន្យល់ថា គ្រប់យ៉ាងគឺស្ថិតនៅលើការរឹតបន្តឹងច្បាប់ឧស្ម័នពុល។ ប្រសិនបើក្រុមហ៊ុន Mercedes អាចធ្វើឲ្យម៉ាស៊ីន V8 គោរពទៅតាមច្បាប់បាន នោះគឺមិនមានគោលបំណងក្នុងការដាក់ម៉ាស៊ីន V8 ឬម៉ាស៊ីន I6 ឲ្យចូលនិវត្តន៍នោះឡើយ។
យ៉ាងណាក្ដី រថយន្ត AMG C63 នឹងបាត់បង់ជម្រើសម៉ាស៊ីន V8 ដោយប្ដូរមកម៉ាស៊ីន ៤ស៊ីឡាំងវិញ ជាមួយការរាយការណ៍ថារថយន្ត E63 ស៊េរីថ្មី ក៏នឹងលុបបំបាត់ជម្រើសម៉ាស៊ីនចំណុះ ៤,០លីត្រផងដែរ៕
