ថ្មីៗនេះ Toyota បានប្រកាសថា រថយន្ត Supra របស់ខ្លួននឹងទទួលបានជម្រើសប្រអប់លេខដៃ ហើយ Nissan ក៏កំពុងផ្តល់ឲ្យអ្នកទិញរថយន្ត Z ថ្មីរបស់ខ្លួន នូវជម្រើសលេខដៃផងដែរ។
ប៉ុន្តែ ជារួម ប្រអប់លេខដៃ មិនជារស់នៅបានយូរប៉ុន្មានទៀតទេ ស្របពេលដែលយុគសម័យរថយន្តអគ្គិសនីខិតជិតមកដល់យ៉ាងឆាប់រហ័ស ហើយគួបផ្សំនឹងការកើនឡើងនៃតម្រូវការសម្រាប់យានជំនិះដែលប្រើប្រអប់លេខអូតូ ក្រុមហ៊ុនផលិតរថយត្តកាន់តែច្រើន ឡើងកំពុងជ្រើសរើសផ្លាស់ទីឆ្ងាយពីជម្រើសប្រអប់លេខដៃ។
បើយោងតាមគេហទំព័រ Automobilwoche បានរាយការណ៍ថា រថយន្ត Mercedes-Benz គឺជាក្រុមហ៊ុនចុងក្រោយបង្អស់មួយ ដែលសម្រេចចិត្តឈប់ផលិតរថយន្តប្រើលេខដៃ។
វាត្រូវបានគេរំពឹងថានឹងកើតឡើងនៅឆ្នាំ ២០២៣ នេះបើតាមអ្នកនាំពាក្យក្រុមហ៊ុន ដែលបានកត់សម្គាល់ថា ការប្ដូរទៅប្រើតែប្រអប់លេខអូតូ ត្រូវបានជំរុញដោយតម្រូវការខ្លាំងសម្រាប់ផលិតផលអគ្គិសនី។
“ជាមួយនឹងការកើនឡើងនៃការប្រើប្រាស់រថយន្តអគ្គិសនី យើងឃើញថាតម្រូវការរបស់អតិថិជនកំពុងផ្លាស់ប្តូរឆ្ពោះទៅរកសមាសធាតុចល័តអគ្គិសនី អាគុយ និង ប្រព័ន្ធបើកបរអគ្គិសនី”។ នេះបើតាមសម្តីអ្នកនាំពាក្យខាងលើ៕
