ក្រុមហ៊ុន Mercedes-Benz ទើបតែបានបញ្ចេញ SUV ខ្នាតតូចរបស់ខ្លួន ម៉ូដែល GLA ស៊េរឆ្នាំ២០២១ ជាផ្លូវការ ដែលបានផ្លាស់ប្តូររូបរាងថ្មីសន្លាង (all-new) តែម្តង។
រថយន្ត Mercedes-Benz GLA មានរូបរាងស្រស់ស្អាតជាងមុន ធំជាងមុន ហើយបំពាក់បច្ចេកវិទ្យាទំនើបជាងមុនផងដែរ។ ឥឡូវនេះ GLA ថ្មី បានប្រើគ្រោងឆ្អឹងដូចទៅនឹងរថយន្ត Mercedes-Benz A-Class Sedan, CLA Coupe និង GLB ដែរ។
ផ្នែកខាងក្នុងរបស់វាត្រូវបានរៀបចំឡើង ស្រដៀងទៅនឹងរថយន្ត A-Class ដែរ ជាមួយនឹងអេក្រង់បង្ហាញព័ត៌មាន MBUX និងកុងទ័រឌីជីថលដ៏ធំ ទំហំ ១០,២៥អ៊ីង, ប្រព័ន្ធភ្លើង Ambience Lighting, ពូកស្បែក ហើយពោរពេញដោយច្ចេកវិទ្យាទំនើប។
រថយន្ត GLA 250 ប្រើម៉ាស៊ីនចំណុះ ២,០លីត្រ Turbo ទំហំ ៤ស៊ីឡាំង មានកម្លាំង ២២១សេះ ប្រើប្រអប់លេខអូតូ ៨វគ្គ អាចជាន់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេល ៧,២វិនាទី។
សូមបញ្ជាក់ថា រថយន្តនេះនឹងចេញលក់នៅក្នុងឆ្នាំ២០២០ ខាងមុខ ជាមួយតម្លៃចន្លោះពី ៣៥ ០០០ដុល្លារ ទៅ ៤៥ ០០០ដុល្លារ លើទីផ្សារសហរដ្ឋអាមេរិក៕
