ក្រុមហ៊ុន Mercedes បានធ្វើការដាក់បង្ហាញរថយន្តត្រកូល CLA ជំនាន់ទី ៣ ស៊េរីឆ្នាំ ២០២៦ ជារថយន្ដប្រើប្រាស់អគ្គិសនីប្រភេទ Wagon ដំបូងរបស់ខ្លួន។
តាមការរំពឹងទុករថយន្ត Mercedes-Benz CLA Shooting Brake នឹងចាប់ផ្តើមដាក់លក់នៅអឺរ៉ុបនៅមីនានៅឆ្នាំក្រោយ ប៉ុន្តែវានឹងមិនត្រូវបានលក់នៅសហរដ្ឋអាមេរិកនោះទេ។ នៅផ្នែកខាងមុងរថយន្ដនេះមានការរចនាដូចទៅនឹងរថយន្ត Mercedes-Benz CLA ប្រភេទ Sedan ដែរដោយមានការឌីស្សាញអំពូលអូសកាត់ជារបា ចង្កៀងខាងមុខជាប្រភេទ LED នៅផ្នែកចំហៀងបានរចនាមកជាមួួយដៃទ្វាររាបស្មើ ខណៈស្ដុបការក្រោយឌីស្សាញបែបបន្ទាត់អូសកាត់ពេញទទឹងផ្នែកខាងមុខ និងបំពាក់បន្ថែមជាមួយ Spoiler នៅជាប់ដំបូលផ្នែកខាងក្រោយ។
ចំណុចពិសេសគួរឲ្យចាប់អារម្មណ៍រថយន្ត Mercedes CLA Shooting Brake បានបំពាក់មកជាមួយដំបូលកញ្ចក់ Panoramic រួមបញ្ចូលជាមួយស្រទាប់ការពារកម្ដៅ ដើម្បីជួយកាត់បន្ថយផលប៉ះពាល់នៃថាមពលកម្ដៅថ្ងៃចូលមកផ្នែកខាងក្នុងនៃរថយន្ដ។ លើសពីនេះ ដំបូលកញ្ចក់នេះក៏អាចផ្លាស់ប្ដូរពីថ្លាទៅជាស្រអាប់បានដោយគ្រាន់តែចុចប៊ូតុងបញ្ជានៅក្នុងរថយន្ដ។ ចំពោះដំបូលកញ្ចក់នេះក៏មានលេងជាមួយរូបផ្កាយចំនួន ១៥៨គ្រាប់ ហើយអាចបញ្ចេញពន្លឺជាពណ៌ផ្សេងៗតាមរយៈការបញ្ជា។
Mercedes CLA Shooting Brake ផ្ដល់ជូនទំហំផ្ទុកអីវ៉ាន់បាន ៤៦ ហ្វីតគូបនៅពេលកៅអីខាងក្រោយបត់រាបស្មើ ខណៈផ្នែកខាងមុខបានបន្ថែមកន្លែងផ្ទុកឥវ៉ាន់ ៤ហ្វីតគូប ផ្ដល់ភាពងាយស្រួលក្នុងការទុកដាក់អីវ៉ាប់។ សម្រាប់ម៉ូឌែល CLA250+ ដំណើរការដោយម៉ូទ័រអគ្គិសនីនៅផ្នែកខាងក្រោយ អាចផលិតកម្លាំង ២៦៨សេះ និងអាចបើកបរបាន ៧៦១គីឡូម៉ែត្រ គិតតាមស្ដង់ដារវាស់ចម្ងាយ WLTP ។ ចំណែកឯម៉ូឌែល CLA350 ដំណើរដោយម៉ូទ័រអគ្គិសនីចំនួន២ អាចផលិតកម្លាំងបាន ៣៤៩សេះ និងអាចបើកបរបានចម្ងាយ ៦២១គីឡូម៉ែត្រ។
រថយន្ដ Mercedes CLA Shooting Brake អាចជាន់ស្ទុះពីកុងទ័រ ០ ទៅ ១០០គីឡូម៉ែត្រក្នុងមួយម៉ោង ចាយពេលត្រឹមតែ ៦.៨ វិនាទី និងអាចបើកបរល្បឿនអតិបរមាន ២១០ គីឡូម៉ែត្រក្នុងមួយម៉ោង។ រថយន្ដទាំងពីរម៉ូឌែលនេះបំពាក់ដោយអាគុយទំហំ ៨៥kWh គាំទ្រការសាកថ្ម ៨០០វ៉ុល ហើយការសាកថ្មល្បឿនលឿិនទំហំ ៣២០គីឡូវ៉ាត់ សាកថ្ម ១០នាទីអាចបើកបរបានចម្ងាយ ៣០០គីឡូម៉ែត្រ។ បន្ថែមពីនេះក្រុមហ៊ុន Mercedes បានបញ្ជក់ថាក្រៅពីជម្រើសប្រើប្រាស់អគ្គិសនីសុទ្ធ ពួកគេនឹងបន្ថែមមកជាមួយជម្រើ់សម៉ាស៊ីន Hybrid ដូចទៅនឹងម៉ូឌែល Sedan ដែរនៅឆ្នាំក្រោយ។
នៅខាងក្នុងរថយន្ដនេះបានរចនាបែប MBUX បំពាក់មកជាមួយអេក្រង់ចំនួន៣ ក្នុងនោះបានបំពាក់មកជាមួយអេក្រង់កុងទ័រទំហំ ១០.២៤ អុីញ អេក្រង់កម្សាន្ដទំហំ ១៤អុីញ និងអេក្រង់ ១៤ អុីញសម្រាប់អ្នកដំណើរខាងមុខ។ លើសពីនេះ វាក៏បានបំពាក់មកជាមួយមុខងារ Head-up Display ទំហំ ១២.២ អុីញផងដែរ៕
