[បរទេស] ក្រុមហ៊ុនផលិតរថយន្ត Mercedes បានធ្វើការដាក់បង្ហាញជាលើកដំបូងនៅរថយន្ត Mercedes-Maybach Haute Voiture ជាប្រភេទ sedan ដ៏ប្រណិតដែលបំផុសគំនិតដោយ fashion style ជាមួយចំនួនមានកំណត់ត្រឹមតែ ១៥០ គ្រឿងប៉ុណ្ណោះ គ្រោងនឹងដាក់លក់ជាផ្លូវការនៅដើមឆ្នាំ ២០២៣ ។
Maybach នេះផ្អែកលើរថយន្ត Maybach S 680 ដោយផ្នែកខាងក្រៅនៃម៉ូដែលថ្មីត្រូវបានតុបតែងជា ២ ពណ៌នឹងពណ៌ខៀវនៅលើកំពូល ជាមួយពណ៌មាស (rose gold) នៅផ្នែកខាងក្រោម ថាសកង់ត្រូវបានរចនាពណ៌ខៀវដូចគ្នាទៅនឹងផ្នែកខាងលើ។
រីនៅខាងក្នុង កាប៊ីនតុបតែងជាមួយពណ៌មាស (rose gold) និងពណ៌រាងក្រម៉ៅនៅលើទ្វារខាងលើ ដៃចង្កូត និងផ្ទៃតាឡូ និងពណ៌សគ្រីស្តាល់មាននៅលើកៅអីពូកស្បែក កុងសូល និងដៃទ្វារ។ បន្ថែមពីនេះ ប្រព័ន្ធប្រតិបត្តិការ MBUX ក៏ត្រូវបានអាប់ដេតនិងមានតែសម្រាប់ម៉ូដែលនេះប៉ុណ្ណោះ។
សម្រាប់រថយន្ត S 680 Haute Voiture នីមួយៗបានភ្ជាប់មកជាមួយប្រអប់អនុស្សាវីយ៍ធ្វើដោយដៃមានលេខផ្លាកសញ្ញារបស់រថយន្ត គំរូខ្នាត និងបណ្តោងកូនសោ។ វាក៏មានគម្របរថយន្តពិសេសដែលមានឡូហ្គោ Maybach និង Haute Voiture ផងដែរ។
គួរឲ្យដឹងថា Mercedes បានដាក់បង្ហាញរថយន្ត Maybach S-Class Haute Voiture នៅទីក្រុងឌូបៃ។ ជាមួយគ្នានេះ យោងតាមគេហទំព័រ Motor1.com បានទាក់ទងទៅក្រុមហ៊ុនអំពីតម្លៃ ដោយសម្រាប់ម៉ូដែលស្ដង់ដារ Maybach S 680 4MATIC មានតម្លៃលក់ចាប់ពី ២២៩ ០០០ ដុល្លារនៅសហរដ្ឋអាមេរិក៕
