អតិថិជនដែលបានទៅកាន់ហាងលក់រថយន្ត Nissan នៅសហរដ្ឋអាមេរិក នៅក្នុងខែធ្នូខាងមុខ នឹងមានឱកាសបើកបរសាកល្បងរថយន្ត Toyota RAV4 ពេលដែលពួកគេចង់ទិញរថយន្ត Nissan Rogue ជំនាន់ថ្មី។
នេះគឺជាយុទ្ធសាស្ត្រថ្មីមួយរបស់ Nissan ដើម្បីឲ្យអតិថិជនអាចធ្វើការប្រៀបធៀបរវាងរថយន្ត Nissan Rogue របស់ខ្លួន ជាមួយនឹងរថយន្ត Toyota RAV4។ Nissan ជឿជាក់ថាអតិថិជននឹងភ្ញាក់ផ្អើលនឹងលក្ខណៈពិសេសរបស់ Nissan Rogue ពេលប្រៀបធៀបនឹង Toyota RAV4 ហើយអាចមានអារម្មណ៍ចង់ទិញរថយន្ត Nissan កាន់តែខ្លាំង។
យ៉ាងណាក្ដីខាង Toyota បានធ្វើការឆ្លើយតបនឹងយុទ្ធសាស្ត្ររបស់ Nissan ដោយបាននិយាយដូចនេះថា ៖ “យើងជឿជាក់ថាហាងលក់ និងអតិថិជនរបស់គេ នឹងកោតសរសើរគុណភាព គុណតម្លៃ និងមុខងារសុវត្ថិភាពដែលមានលើរថយន្ត RAV4 ដែលជា SUV លក់ដាច់ជាងគេនៅសហរដ្ឋអាមេរិក។”
រថយន្ត Nissan Rogue ជំនាន់ថ្មី មានដាក់លក់តម្លៃចាប់ពី ២៥ ៧០០ដុល្លារ នៅសហរដ្ឋអាមេរិក ខណៈដែលរថយន្ត RAV4 ស៊េរីឆ្នាំ ២០២១ គឺមានតម្លៃចាប់ពី ២៦ ១០០ដុល្លារ៕
