ក្រុមហ៊ុន Nissan បានប្រកាសពីការបញ្ចប់ការផលិតរថយន្តម៉ាក Datsun នៅក្នុងប្រទេសឥណ្ឌា ដែលជាការកត់សម្គាល់នៃការស្លាប់លើកទី២ នៃម៉ាកយីហោជប៉ុននេះ។
គួរឲ្យដឹងដែរថា រោងចក្រ Chennai នៅក្នុងប្រទេសឥណ្ឌា គឺជាកន្លែងផលិតចុងក្រោយបង្អស់ដែលនៅសេសសល់របស់ Datsun បន្ទាប់ពីរោងចក្រនៅក្នុងប្រទេសរុស្ស៊ី និង ឥណ្ឌូនេស៊ី ត្រូវបានបិទទ្វារនៅឆ្នាំ ២០២០។
ការស្លាប់របស់ Datsun ត្រូវបានកំណត់ទុកជាមុនដោយសារតែការលក់បានចំនួនតិចតួច។ របាយការណ៍ដំបូងត្រូវបានចេញផ្សាយក្នុងឆ្នាំ ២០១៩ ដែលជាផ្នែកមួយនៃផែនការរៀបចំរចនាសម្ព័ន្ធឡើងវិញ របស់ក្រុមហ៊ុន Nissan បន្ទាប់ពីរឿងអាស្រូវ Carlos Ghosn។ Datsun បានស្លាប់បន្តិចម្តងៗ ចាប់តាំងពីពេលនោះមក ជាមួយនឹងរថយន្តចុងក្រោយ ដែលនឹងមកដល់ក្នុងឆ្នាំនេះ។
ទោះបីជាមានការបញ្ឈប់ម៉ាកយីហោ Datsun ក៏ដោយ ប៉ុន្តែ Nissan នៅតែប្តេជ្ញាចិត្តចំពោះម្ចាស់រថយន្ត Datsun ដោយប្រកាសថា ខ្លួននឹងបន្តផ្តល់សេវាកម្មបន្ទាប់ពីការលក់ គ្រឿងបន្លាស់ និងការធានា តាមរយៈបណ្តាញអ្នកចែកចាយផ្ទាល់របស់ខ្លួននៅក្នុងប្រទេសឥណ្ឌា៕
