Porsche បានអះអាងថាមិនចាប់ចិត្តក្នុងការសាងសង់រោងចក្រផលិតរថយន្តនៅប្រទេសចិននោះទេ ទោះបីជាប្រទេសចិនគឺជាទីផ្សារដ៏ធំបំផុតមួយរបស់ខ្លួនក្ដី។
លោក Oliver Blume ប្រធានក្រុមហ៊ុន Porsche បាននិយាយប្រាប់ Financial Times ដូចនេះថា ៖ “បច្ចុប្បន្ននេះខ្ញុំថាវាមិនសមហេតុផលក្នុងការសាងសង់រោងចក្រផលិតនៅចិន។ ប៉ុន្តែ ១០ឆ្នាំទៀត ខ្ញុំមិនដឹងទេ។ វាអាស្រ័យលើថាទីផ្សារប្រទេសចិននឹងមានតម្រូវការកើនឡើងកម្រិតណា និងអាស្រ័យលើច្បាប់ក្នុងប្រទេសនីមួយៗផងដែរ។”
លោក Blume បានបន្ថែមថា តាមរយៈការបន្តផលិតរថយន្ត Porsche មួយភាគធំនៅប្រទេសអាល្លឺម៉ង់ គឺអាចរក្សាតម្លៃលក់ឲ្យមានស្ថិរភាពបាន។ លោកបានបន្ថែមទៀតថា វាមានតម្លៃក្នុងការចំណាយថ្លៃកម្លាំងពលកម្មខ្ពស់នៅប្រទេសអាល្លឺម៉ង់ ដើម្បីរក្សាកេរ្តិ៍ឈ្មោះ “ផលិតនៅអាល្លឺម៉ង់” របស់ក្រុមហ៊ុន។
គួរដឹងថាកាលពីឆ្នាំ ២០២០ ក្រុមហ៊ុនអាល្លឺម៉ង់នេះអាចលក់រថយន្តបានសរុប ២៧២ ១៦២គ្រឿង ដែលក្នុងនោះគឺមាន ៨៨ ៩៦៨គ្រឿងត្រូវបានដឹកជញ្ជូនទៅកាន់ប្រទេសចិន។ ចំនួននេះគឺច្រើនជាងចំនួននៅអឺរ៉ុប (៨០ ៨៩២គ្រឿង) និង សហរដ្ឋអាមេរិក (៨០ ៨៩២គ្រឿង) ទៅទៀត៕
