Ram 1500 TRX គឺជាភីកអាប់ដែលទទួលបានការចាប់អារម្មណ៍ខ្លាំងបំផុតមួយ នៅលើទីផ្សារបច្ចុប្បន្ននេះ ដោយសារតែ Performance ក៏ដូចជាសមត្ថភាព Off-road របស់វា។
ថ្មីៗនេះក្រុមហ៊ុន Ram បានប្រកាសចេញរថយន្ត 1500 TRX ម៉ូដែលពិសេសថ្មីមួយទៀត ហៅថា Ignition Edition ដែលមាននឹងត្រូវផលិតមានចំនួនកំណត់ ត្រឹមតែ ៨៧៥គ្រឿងប៉ុណ្ណោះ។
រថយន្ត Ram 1500 TRX Ignition Edition ថ្មីនេះ មានតួខ្លួនពណ៌ទឹកក្រូច ក៏ដូចជាកាប៊ីនខាងក្នុងរំលេចពណ៌ទឹកក្រូចផងដែរ។ ក្រៅពីនោះ វាក៏មានតែមពិសេស និងយ៉ាន់កង់ទំហំ ១៨អ៊ីញទៀតផង។
ភីកអាប់នេះមានបំពាក់កញ្ចប់ Option “Level 2 Equipment Group” ដោយក្នុងនោះរួមមាន ដំបូលកញ្ចក់វែង panoramic sunroof, ទ្រុងដឹកមានទំពក់ចងអីវ៉ាន់, ជណ្តើរទ្រុងដឹកក្រោយ, អំពូលហ្វ្រាំង LED, កុងទ័របាញ់លើកញ្ចក់ និង មុខងារហ្វ្រាំងអាសន្នសម្រាប់អ្នកថ្មើរជើង ផងដែរ។
រថយន្ត Ram 1500 TRX Ignition Edition នៅតែបន្តប្រើម៉ាស៊ីនចំណុះ ៦,២លីត្រ supercharged ទំហំ ៨ស៊ីឡាំង ដដែល ដែលអាចបង្កើតកម្លាំងបាន ៧០២សេះ និងកម្លាំងរមួល ៨៨១ញ៉ូតុនម៉ែត្រ។ សូមបញ្ជាក់ថា ភីកអាប់នេះនឹងត្រូវដាក់លក់ក្នុងតម្លៃចាប់ពី ៩៣ ២៨០ដុល្លារឡើងទៅ ហើយនឹងចេញលក់នៅចុងឆ្នាំនេះតែម្តង៕
