ក្រុមហ៊ុន Slate Auto ត្រៀមនឹងដាក់សម្ពោធរថយន្តភីកអាប់អគ្គិសនីដែលមានតម្លៃសមរម្យរបស់ខ្លួននៅឆ្នាំក្រោយ ហើយប្រសិនបើការកុម្ម៉ង់ទាំងអស់ដែលទទួលបានកន្លងមក ក្លាយជាការបញ្ជាទិញពិតប្រាកដមែននោះ វានឹងធ្វើឱ្យផលិតកម្មពេញមួយឆ្នាំរបស់ក្រុមហ៊ុនត្រូវលក់អស់គ្មានសល់។
ថ្មីៗនេះ ក្រុមហ៊ុន Slate Auto បានបង្ហើបឲ្យដឹងថា រថយន្ត Slate Truck ត្រូវបានគេរាយការណ៍ថាមានតម្លៃប្រហែល ២៥ ០០០ ដុល្លារនេះ ហើយទទួលបានការកុម្ម៉ង់លើសពី ១៥០ ០០០ គ្រឿងទៅហើយ ចំនួននេះគឺស្មើនឹងចំនួនរថយន្តដែលក្រុមហ៊ុនគ្រោងនឹងផលិតប្រចាំឆ្នាំ នៅពេលដែលខ្លួនពង្រីកសមត្ថភាពផលិតកម្មបានពេញលេញ។ យ៉ាងណាមិញប្រាក់កក់ទាំងអស់អាចដកវិញបានពេញចំនួន ប៉ុន្តែមិនអាចផ្ទេរសិទ្ធិឲ្យអ្នកដទៃបានទេ នេះបើតាមការបញ្ជាក់របស់ក្រុមហ៊ុនផ្ទាល់។
គួរបញ្ជាក់ផងដែរចំពោះផលិតកម្មយានយន្ដរបស់ពួកគេត្រូវបានកំណត់ថានឹងចាប់ផ្តើមនៅចុងឆ្នាំក្រោយ និងបន្តពង្រីកសង្វាក់ផលិតកម្មរហូតដល់ឆ្នាំ ២០២៧។ ផែនការនេះគឺដើម្បីសម្រេចឲ្យបាននូវគោលដៅផលិតកម្មអតិបរមាប្រចាំឆ្នាំនៅត្រឹមដំណាច់ឆ្នាំ ២០២៧ ទោះបីជាយ៉ាងណាក៏ដោយ គេនៅមិនទាន់ដឹងច្បាស់ថា តើការកុម្ម៉ង់ទុកមុនទាំងនេះនឹងក្លាយទៅជាការទិញពិតប្រាកដចំនួនប៉ុន្មាននោះទេក្នុងពេលខាងមុខ។
ក្រុមហ៊ុន Slate បានបញ្ចេញវីដេអូមួយកាលពីដើមសប្តាហ៍នេះ ក្នុងនោះលោកស្រី Chris Barman ជាអគ្គនាយកប្រតិបត្តិ បានឆ្លើយតបទៅនឹងសំណួរនានាពីសំណាក់អ្នកដែលមានបំណងចង់ទិញរថយន្ដនេះ។ ក្រុមហ៊ុនបានជ្រើសរើសយកសំណួរមួយចំនួនតូច ចេញពីសំណួរដែលទទួលបានសរុបជាង ៤ ០០០ សំណួរ ហើយវីដេអូនោះបង្ហាញពីភាពវិជ្ជមាន និងសុទិដ្ឋិនិយម ទោះបីជាការលក់រថយន្តអគ្គិសនីនៅក្នុងសហរដ្ឋអាមេរិក និងទីផ្សារសកលបានធ្លាក់ចុះ បន្ទាប់ពីការកាត់បន្ថយ ឬការលុបចោលកម្មវិធីលើកទឹកចិត្តផ្សេងៗ។
នៅក្នុងឆ្នាំដែលបច្ចេកវិទ្យាយានយន្តបើកបរដោយខ្លួនឯង (Autonomous vehicles), រ៉ូបូតតាក់ស៊ី (Robotaxis) និងប្រព័ន្ធជំនួយការបើកបរស្វ័យប្រវត្តិ កំពុងមានសន្ទុះខ្លាំង លោកស្រី Barman បានឆ្លើយតបទៅនឹងសំណួរដ៏ក្ដៅគគុកមួយរបស់អតិថិជនសួរថា៖ តើរថយន្ត Slate Truck នឹងមានបច្ចេកវិទ្យាបើកបរដោយខ្លួនឯងដែរឬទេ? អ្នកស្រី Barman បានឆ្លើយយ៉ាងខ្លី និងសាមញ្ញបំផុត “អត់ទេ” មុននឹងបន្តទៅសំណួរបន្ទាប់។
ចម្លើយនេះពិតជាសមហេតុផលណាស់ ព្រោះចំណុចទាក់ទាញបំផុតរបស់ Slate Truck គឺ “តម្លៃ”។ គោលដៅរបស់ក្រុមហ៊ុនដែលគាំទ្រដោយ Amazon មួយនេះ គឺចង់លក់រថយន្តក្នុងតម្លៃប្រហែល ២០ ០០០ ដុល្លារ ប៉ុន្តែតម្លៃនេះគឺបានរាប់បញ្ចូលទាំងការទទួលបានការបញ្ចុះពន្ធរដ្ឋាភិបាល (Federal EV tax credit) ចំនួន ៧ ៥០០ ដុល្លារ ដែលបានបញ្ចប់កាលពីថ្ងៃទី ៣០ ខែកញ្ញា ឆ្នាំនេះ។
ឥឡូវនេះ ក្រុមហ៊ុនរំពឹងថានឹងលក់រថយន្តភីកអាប់នេះក្នុងចន្លោះតម្លៃ ២០ ០០០ ដុល្លារក្រាស់ ប្រហែលជា ២៦ ០០០ ឬ ២៧ ០០០ ដុល្លារ។ ការបន្ថែមមុខងារបើកបរដោយស្វ័យប្រវត្តិកម្រិតខ្ពស់ណាមួយ ប្រាកដជានឹងធ្វើឲ្យតម្លៃរបស់វាហក់ឡើងខ្ពស់ជាងនេះឆ្ងាយមិនខាន៕
