ក្រុមហ៊ុន Subaru បានប្រកាសចេញរថយន្តម៉ូដែល Outback Wilderness ស៊េរីឆ្នាំ២០២២ ជាផ្លូវការ ដោយមានតម្លៃចាប់ពី ៣៦ ៩៩៥ដុល្លារ។
រថយន្ត Subaru Outback Wilderness ត្រូវបានផលិតឡើងដោយផ្តោតលើការបើកបរ off-road ដោយមានបំពាក់ប៉ាណាមុខ និងកាងមុខពិសេស ខុសប្លែកពីម៉ូដែល Outback ផ្សេងទៀត។
បន្ថែមពីនេះ វាក៏មានបំពាក់បន្ទះការពារបាតក្រោម និងរបាំងផុកលៀន ព្រមទាំងរឺហ្គែរលើដំបូល, សម្បកកង់ Yokohama Geolandar all-terrain, យ៉ាន់ពណ៌ខ្មៅគ្រើម ទំហំ ១៧អ៊ីញ និងកល់បូមខ្ពស់ជាងមុន សរុបពីបាតរថយន្តដល់ដី គឺ ២៤១មីល្លីម៉ែត្រ។
ចំណែកឯកាប៊ីនខាងក្នុងវិញ រថយន្ត Subaru Outback Wilderness ឆ្នាំ២០២២ បំពាក់អេក្រង់កម្សាន្តទមហំ ១១,៦អ៊ីញ អាចភ្ជាប់មុខងារ Android Auto និង Apple CarPlay, ប្រព័ន្ធម៉ាស៊ីនត្រជាក់ dual-zone និងកម្រាលជើងប្រើបានគ្រប់ស្ថានភាពអាកាសធាតុ ទៀតផង។
Outback Wilderness បំពាក់ម៉ាស៊ីនចំណុះ ២,៤លីត្រ turbocharged ទំហំ ៤ស៊ីឡាំង មានកម្លាំង ២៦០សេះ ដំណើរការដោយប្រអប់លេខអូតូ CVT និងប៉ុងពីរ៕
