យីហោប្រណិតរបស់ក្រុមហ៊ុន FAW បានចាប់ផ្តើមធ្វើការនាំចេញរថយន្ត SUV អគ្គិសនីទំនើបខ្លួនទៅកាន់ទីផ្សារប្រទេសន័រវេស ដែលជាជំហានដំបូងនៃការពង្រីកផែនការអាជីវកម្មនៅលើទីផ្សារអ៊ឺរ៉ុបរបស់ខ្លួន ជាមួយជម្រើសរថយន្ត SUV ប្រភេទ ៦ ឬ ៧កៅអី។
ជាមួយការជ្រើសយករថយន្ត E-HS9 ជាម៉ូឌែលក្នុងការពង្រីកទីផ្សារលើទឹកដឺអ៊ឺរ៉ុបដំបូងរបស់ខ្លួន ក្រុមហ៊ុនផលិតរថយន្តនេះ បានទទួលការបញ្ជាទិញមុនចំនួន ៥០០គ្រឿងហើយនៅក្នុងប្រទេស ន័រឌីច (Nordic) ដែលជាទីផ្សារឈានមុខនៅអ៊ឺរ៉ុប ក្នុងការប្រើប្រាស់រថយន្តអគ្គិសនី។
រថយន្ត E-HS9 បំពាក់ជាមួយជម្រើសអាគុយទំហំ ៨៤គីឡូវ៉ាត់ម៉ោង អនុញ្ញាតអោយបើកបរបានចម្ងាយ ៣៩៦គីឡូម៉ែត្រ និងទំហំ ៩៩គីឡូវ៉ាត់ម៉ោង បើកបរបានចម្ងាយ ៤៦៥គីឡូម៉ែត្រ។ ព្រមទាំងអាចស្ទុះពីល្បឿន ០-១០០គីឡូម៉ែត្រប្រើពេល ៤,៩វិនាទី និងមានល្បឿនអតិបរមា ២០០គីឡូម៉ែត្រក្នុងមួយម៉ោង។
រថយន្ត SUV អគ្គិសនីប្រណិតនេះនឹងបង្ហាញវត្តមាននៅក្នុងអាគាតាំងបង្ហាញក្នុងប្រទេសន័រវេ នាខែធ្នូនេះ ជាមួយតម្លៃចាប់ពី ៧២ ៧០០ដុល្លារឡើងទៅ៕
