ក្រុមហ៊ុនផលិតរថយន្តកំពុងវិនិយោគលើ យន្តហោះឡើង និង ចុះចតបញ្ឈរ (vertical takeoff and landing ឬ VTOL) ស្របពេលដែលក្រុមហ៊ុន Suzuki របស់ប្រទេសជប៉ុន បានចុះកិច្ចព្រមព្រៀងភាពជាដៃគូថ្មី ជាមួយក្រុមហ៊ុន SkyDrive Inc ។
ក្រុមហ៊ុនទាំងពីរបានប្រកាសថា ពួកគេបានចុះហត្ថលេខាលើកិច្ចព្រមព្រៀងមួយ ដើម្បីរួមគ្នាស្រាវជ្រាវ អភិវឌ្ឍ និង ធ្វើទីផ្សារលើរថយន្តអគ្គិសនីហោះ (VTOL) នាពេលខាងមុខ។
ទោះបីជាយ៉ាងណាក៏ដោយ ព័ត៌មានលម្អិតនៃកិច្ចព្រមព្រៀងខាងលើ មិនត្រូវបានបង្ហាញឲ្យដឹងនោះទេ ដូច្នេះព័ត៌មានអំពីទំហំនៃការវិនិយោគ និង ពេលវេលាផលិតកម្ម នៅតែមិនបានបង្ហាញឡើយ។
យ៉ាងណាក៏ដោយ ក្រុមហ៊ុនទាំងពីរនោះបាននិយាយថា ពួកគេនឹងធ្វើការដើម្បីបើកទីផ្សារថ្មី ដោយផ្តោតលើប្រទេសឥណ្ឌា ជាកន្លែងដែលក្រុមហ៊ុន Suzuki គ្រប់គ្រងប្រហែលពាក់កណ្តាលនៃចំណែកទីផ្សាររថយន្ត។
កាលពីសប្តាហ៍កន្លងទៅនេះ ក្រុមហ៊ុន Suzuki បានប្រកាសថា ខ្លួននឹងវិនិយោគជាង ១ ពាន់លានដុល្លារ នៅក្នុងរោងចក្ររបស់ខ្លួននៅក្នុងប្រទេសឥណ្ឌា ដើម្បីផលិតរថយន្ត និង អាគុយអគ្គិសនី ទៀតផង៕
