រថយន្តភីកអាប់ Toyota Tacoma ស៊េរីចុងក្រោយ ទទួលបានជោគជ័យយ៉ាងខ្លាំង ក្រោយលក់រថយន្ដបានចំនួន ២៣ ៩៤៩ គ្រឿង ក្នុងខែមីនា កើនឡើងដល់ ១៨៨.២% ។
ជាមួយភាពជោគជ័យននេះបានធ្វើឲ្យរបស់រថយន្ត Tacoma ក្លាយជារថយន្តលក់ដាច់បំផុតទីបីរបស់ក្រុមហ៊ុន Toyota កាលពីខែមុន។ ក្រឡែកមកមើលរថយន្ដ Toyota Crown កំពុងមានបញ្ហានៃការលក់ ខណៈរថយន្តប្រភេទ sedan បានធ្លាក់ចុះដល់ ៦៦.៨% ហើយរថយន្ត Signia ចាប់ផ្តើមបន្ដការលក់យឺតដូចគ្នា។
មិនខុសគ្នាប៉ុន្មានទេការលក់រថយន្ត RAV4 ក៏បានធ្លាក់ចុះ ៨.៤% ។ និយាយពីរថយន្តប្រភេទ sedan ក្រុមហ៊ុន Toyota មិនមានហុងស៊ុយសោះ ខណៈដែលរថយន្ត Camry, Corolla, Crown និង Mirai សុទ្ធតែមានការធ្លាក់ចុះ ហើយរឿងដែលស្ទើរមិនគួរឲ្យជឿ រថយន្ត Mirai គ្មានអ្នកទិញសូម្បីតែមួយគ្រឿងកាលពីខែមុន។
ចំណែករថយន្ត Subaru BRZ ទទួលបានការជំរុញការលក់របស់ខ្លួនគួរសម ស្របពេលរថយន្ត Toyota GR86 បានធ្លាក់ចុះ ១៦% ។ ចំពោះរថយន្ត Supra ក៏ធ្លាក់ចុះ ១១.៤% ។ ប៉ុន្តែចម្លែកតែរថយន្ដ Prius បែរជាមានការលក់កើនឡើង ៧៧.៤%។
ចំពោះប្រភេទ SUV វិញម្ដង ការបញ្ចុះតម្លៃរថយន្ត bZ4X ហាក់ដូចជាបានជំរុញការលក់ ខណៈដែលរថយន្តអគ្គិសនីនេះបានកើនឡើង ១០២.៩% ។ រថយន្ត Corolla Cross ដែលមានតម្លៃសមរម្យបានកើនឡើងនៃការលក់ ៣៩.៨% ខណៈដែលរថយន្ត Highlander បានធ្លាក់ចុះ ៥២.១%។
សរុបមក ក្រុមហ៊ុន Toyota បានលក់រថយន្តចំនួន ១៩៦,២៤០ គ្រឿងក្នុងខែមីនា ដែលកើនឡើង ៦.៦% ពីឆ្នាំមុន។ ទោះយ៉ាងណាក៏ដោយ ក្រុមហ៊ុនបានកើនឡើងត្រឹមតែ ០.១% សម្រាប់ត្រីមាសនេះ៕
