[ទីផ្សារបរទេស] ក្រុមហ៊ុន Stellantis កំពុងតែរកចម្រើនឆ្ពោះទៅមុខខ្លាំងជាមួយការលក់រថយន្តអគ្គិសនី ដោយក្រុមហ៊ុននេះបានផ្ដួល Tesla នៅក្នុងឆមាសទីមួយ សម្រាប់ការលក់ក្នុងទីផ្សារអឺរ៉ុប ហើយថែមទាំងតាមពីក្រោយក្រុមហ៊ុន Volkswagen Group យ៉ាងប្រកិតទៀតផង។
ក្រុមហ៊ុនដែលកើតចេញពីការរួមបញ្ចូលគ្នារវាង PSA Group និង Fiat Chrysler Automobiles នេះ អាចលក់រថយន្តអគ្គិសនីសុទ្ធបានសរុប ១០៥ ៤១៣គ្រឿង នៅក្នុងឆមាសទីមួយនៃឆ្នាំ២០២២ ធៀបនឹង Tesla លក់បាន ៧៨ ២៧៧គ្រឿង និង Volkswagen Group លក់បាន ១១៦ ៣០៧គ្រឿង។
រថយន្តដែលលក់ដាច់ជាងគេរបស់ Stellantis នៅទីផ្សារអឺរ៉ុបគឺរថយន្ត Fiat 500 ស៊េរីថ្មីដែលវាក៏ជារថយន្តអគ្គិសនីសុទ្ធលក់ដាច់ជាងគេនៅអឺរ៉ុបប្រចាំត្រីមាសទីពីរផងដែរ។ នេះជាការកត់ត្រាលើកដំបូងដែលរថយន្តរបស់ Tesla មិនបានជាប់ជារថយន្តលក់ដាច់ជាងគេចាប់តាំងពីត្រីមាសចុងក្រោយនៃឆ្នាំ២០២០មក។
ទោះបីជាចំនួនលក់របស់ Tesla នៅអឺរ៉ុបបានធ្លាក់ចុះដល់ចំណុចទាបបំផុតក្នុងពេលពីរឆ្នាំ ប៉ុន្តែរថយន្ត Tesla បានជាប់ចំណាត់ថ្នាក់កំពូលទាំងពីរប្រចាំឆមាសដំបូងនៅអឺរ៉ុប ដោយរថយន្ត Model Y លក់ចេញបាន ៣៩ ៩៦៩គ្រឿង, Model 3 លក់ចេញបាន ៣៨ ២៨០គ្រឿង, Fiat 500 លក់ចេញបាន ៣២ ៣១៥គ្រឿង និង Peugeot e-208 លក់ចេញបាន ២១ ៩១៨គ្រឿង៕
