កាលពីថ្មីនេះ Tesla បានដាក់ពាក្យសុំអាជ្ញាប័ណ្ណលក់រថយន្ត Model 3 ជំនាន់ថ្មីរបស់ខ្លួននៅប្រទេសចិន មានសមត្ថភាពអាចបើកបានចម្ងាយ ៨០០គីឡូម៉ែត្រ។ រថយន្ដនេះអាចនឹងក្លាយជារថយន្ត Tesla ដែលមានរយៈចម្ងាយបើកបរឆ្ងាយបំផុតរបស់ពួកគេរហូតមកដល់បច្ចុប្បន្ន។ បើការស្នើរសុំត្រូវបានអនុម័ត ក្រោយការពិនិត្យរបស់ក្រសួងឧស្សាហកម្ម និងបច្ចេកវិទ្យាព័ត៌មាន (MIIT) របស់ចិន Tesla Model 3+ នឹងត្រូវបានចាប់ផ្ដើមដាក់លក់នៅប្រទេសចិននៅខែកញ្ញាខាងមុខនេះ។
នៅផ្នែកខាងក្រោយរថយន្ដនេះភ្ជាប់មកជាមួយអក្សរ Model 3+ ជាឈ្មោះរបស់រថយន្ដនេះ។ Tesla Model 3+ ដំណើរដោយម៉ូទ័រចំនួនមួយ នៅផ្នែកខាងក្រោយនិងបានបំពាក់មកជាមួយអាគុយ NMC (nickel manganese cobalt) បច្ចុប្បន្ននេះ អាគុយ NMC LG ត្រូវបានប្រើសម្រាប់តែម៉ូឌែល Model 3 Long Range AWD និង Performance ប៉ុណ្ណោះ។
ចំពោញកំណែទម្រង់ដាក់ឲ្យដំណើរការតែម៉ូទ័រអគ្គិសនីចំនួននៅផ្នែកខាងក្រោយ (RWD) មានការប្រើប្រាស់ថាមពលទាបជាងម៉ូឌែលប្រើប្រាស់ម៉ូទ័រអគ្គិសនីចំនួន២ (AWD) ដូច្នេះបានជាងរថយន្ដ Model 3+ បំពាក់មកជាមួយអាគុយ NMC LG អាចបើកបរបានរយៈចម្ងាយឆ្ងាយមិនធ្លាប់មាន។ យោងតាមប្រភពព័ត៌មានចិន Cailian រថយន្ត Tesla Model 3+ ត្រូវបានកំណត់ពេលដាក់លក់នៅដើមខែកញ្ញានៅប្រទេសចិន ជាមួយតម្លៃចាប់ផ្តើមពី ៣៧ ៦០០ដុល្លារ៕
