នាយកប្រតិបត្តិក្រុមហ៊ុន Tesla លោក Elon Musk បានបង្ហើបថា ក្រុមហ៊ុនផលិតរថយន្តអគ្គិសនីរបស់ខ្លួន នឹងចាប់ផ្តើមផលិតរថយន្ត Model Y នៅឯរោងចក្រ Gigafactory ថ្មីរបស់ខ្លួន នៅទីក្រុងប៊ែរឡាំង ប្រទេសអាល្លឺម៉ង់ មុនដំណាច់ឆ្នាំនេះ។
លោក Musk បាននិយាយទៀតថា ផលិតកម្មគួរតែចាប់ផ្តើមនៅខែវិច្ឆិកា ឬខែធ្នូ ឆាប់ៗខាងមុខនេះតែម្តង។ លោក Musk បានបន្ថែមថា ការផ្តល់ជូនរថយន្ត Model Y ដែលផលិតនៅអាល្លឺម៉ង់ ឲ្យអតិថិជនដំបូង ត្រូវបានគេរំពឹងថា នឹងចាប់ផ្តើមនៅខែធ្នូ។
ផ្ទាំងផ្សាយពាណិជ្ជកម្ម
លោក Musk សង្ឃឹមថា រោងចក្រនោះនឹងផលិតរថយន្តពី ៥ ០០០ ទៅ ១០ ០០០ គ្រឿងក្នុងមួយសប្តាហ៍ នៅចុងឆ្នាំ ២០២២ ប៉ុន្តែបានបញ្ជាក់ថា វានឹងចំណាយពេលយូរដើម្បីឈានដល់ការផលិតបរិមាណច្រើន ជាងពេលសម្រាប់សាងសង់រោងចក្រ។
យ៉ាងណាមិញ ក្រុមហ៊ុន Tesla មានបំណងផលិតរថយន្ត Model Y រហូតដល់ ៥០០ ០០០ គ្រឿងក្នុងមួយឆ្នាំ និងមានបុគ្គលិករហូតដល់ ១២ ០០០ នាក់នៅរោងចក្រនោះ៕
ផ្ទាំងផ្សាយពាណិជ្ជកម្ម
