ក្រុមហ៊ុន Toyota បានបង្ហាញឲ្យឃើញនូវគំរូរាងនៃរថយន្ត Aygo ជំនាន់ថ្មី ដែលមានការផ្លាស់ប្ដូររចនាបថថ្មីទាំងស្រុង ដែលរថយន្តគំរូនេះត្រូវបានគេឲ្យឈ្មោះថា Aygo X Prologue Concept។
រថយន្ត Aygo X Prologue Concept បានផលិតចេញឡើងផ្ដាច់មុខដោយ Toyota ផ្ទាល់ មិនមានការចូលរួមចំណែកពីក្រុមហ៊ុន Peugeot និង Citroen ដូចមុននោះទេ ដោយសារក្រុមហ៊ុនទាំងពីរមិនមានគម្រោងការបញ្ចេញស៊េរីថ្មីនៃម៉ូដែល 108 និងម៉ូដែល C1 របស់ខ្លួននោះទេ។
រថយន្ត Aygo ជំនាន់ថ្មីនឹងផលិតឡើងដោយប្រើប្រាស់នូវគ្រោងឆ្អឹងដូចជារថយន្ត Yaris ជំនាន់ថ្មីដែរ គឺគ្រោងឆ្អឹង GA-B ដែលគ្រោងឆ្អឹងនេះអាចប្រើប្រាស់ជាមួយម៉ាស៊ីនច្រើនប្រភេទ ហើយរថយន្ត Aygo នេះដែរនឹងបញ្ចេញលក់ជាមួយជម្រើសម៉ាស៊ីនតូចដើម្បីរក្សាឲ្យបាននូវតម្លៃធូរថ្លៃរបស់វា។
Toyota មិនបាននិយាយអំពីកាលបរិច្ឆេទប្រកាសចេញរថយន្ត Aygo ជំនាន់ថ្មីនៅឡើយទេ ប៉ុន្តែគេរំពឹងថាវានឹងបង្ហាញវត្តមាននៅដំណាច់ឆ្នាំ ២០២១ ឬនៅឆមាសដំបូងនៃឆ្នាំ ២០២២៕
