[បរទេស] ក្រុមហ៊ុនផលិតរថយន្ត Toyota បានធ្វើការដាក់បញ្ចេញនៅគំរូរថយន្តអគ្គិសនីថ្មីបន្ថែមដែលរថយន្តជាប្រភេទ Crossover ខ្នាតតូចនៃត្រកូល bz របស់ខ្លួន បន្ទាប់ពីបានដាក់បង្ហាញចេញនៅ Toyota Prius ស៊េរីឆ្នាំ ២០២៣ ជាផ្លូវការកាលពីពេលថ្មីៗនេះ។
គំរូរថយន្ត bZ Compact SUV នេះគឺពុំមានភាពខុសគ្នាពីម៉ូឌែលដែលបានបង្ហាញនាពេលកន្លងមកនោះឡើយ ឌីស្សាញមកបែប sculpted styling ដោយនៅផ្នែកខាងមុខវាមានមានបំពាក់ចង្កៀងថ្មីរបស់ Toyota ដែលដូចគ្នានៅនឹងរថយន្ត Prius ថ្មី និងប៉ាណាសម្រាប់បឺតខ្យល់ខាងមុខរចនាយ៉ាងទាក់ទាញ។ ខណៈ នៅផ្នែកខាងក្រោយ មានចង្កៀងរចនាជាខ្សែអូសកាត់ពីម្ខាងទៅម្ខាង និងកាងការពារត្រូវបានរចនាយ៉ាងលេចធ្លោសម្រាប់ផ្នែកខាងក្រោមនៃរថយន្តនេះ។
រីឯនៅផ្នែកខាងក្នុង bZ Compact SUV Concept ត្រូវបានឌីស្សាញឡើងដូចជារថយន្តនាពេលអនាគត មានបំពាក់ជាមួយជម្រើសដៃចង្កូតប្រភេទ Yoke Steeling Wheel ដូចរថយន្ត Lexus RZ, កុងទ័របង្ហាញព័ត៌មាននៅជាប់នឹងផ្លៃតាឡូ និងអេក្រង់កំសាន្តស្ថិតនៅចំកណ្តាលនៃកាប៊ីន។ បន្ថែមពីនេះ ក៏មានប្រព័ន្ធជំនួយការ AI ឈ្មោះ Yui ហើយអ្នកបើកបរអាចប្រើការបញ្ជាដោយសំឡេង ហើយប្រព័ន្ធឆ្លើយតបមកវិញសំឡេង និងភ្លើងដែលអាចផ្លាស់ទីជុំវិញកាប៊ីនទៀតផង។
គួរបញ្ជាក់ផងដែរថា សម្រាប់គំរូរថយន្តអគ្គិសនី bZ Compact SUV Concept ក្រុមហ៊ុនផលិតរថយន្ត Toyota នៅមិនទាន់បាននិយាយអំពីកម្លាំងដែលខ្លួននឹងប្រើសម្រាប់ម៉ូដែលនេះទេនៅឡើយទេ៕
