Toyota បានបង្ហាញចេញរថយន្តម៉ូដែល Crown ជំនាន់ថ្មីកាលពីជាងពីរឆ្នាំមុន ហើយពេលនេះក្រុមហ៊ុនបានធ្វើការកែសម្រួលបន្ថែមទៀតសម្រាប់ស៊េរីឆ្នាំ ២០២១ ដែលមានចេញលក់នៅទូទាំងប្រទេសជប៉ុន។
រូបរាងខាងក្រៅមិនមានការផ្លាស់ប្ដូរនោះទេ គ្រាន់តែបន្ថែមជម្រើសពណ៌ថ្មីមួយចំនួន។ ចូលទៅផ្នែកខាងក្នុងគេឃើញមាន Center Console ដែលឌីហ្សាញថ្មី និងរន្ធបាញ់ខ្យល់នៅចំកណ្ដាលដែលប្ដូរទីតាំងខុសពីមុនផងដែរ។
នៅផ្នែកខាងក្នុងមានបំពាក់ដោយអេក្រង់ទំហំ ១២,៣អ៊ីញ ដែលមានភ្ជាប់មកជាមួយសមត្ថភាពតភ្ជាប់ជាមួយស្មាតហ្វូន និងមុខងារពិសេសដទៃទៀត។ ការបញ្ជា HVAC បានធ្វើការផ្លាស់ប្ដូរជាថ្មី ដែលងាយបញ្ជាជាងមុនអំឡុងពេលបើកបរ។ រថយន្ត Sedan កម្រិត Premium នេះក៏មានបំពាក់នូវបច្ចេកវិទ្យា Toyota Safety Sense ជំនាន់ចុងក្រោយផងដែរ។
ដូចបានរំលឹកពីខាងដើម រថយន្ត Toyota Crown ឆ្នាំ ២០២១ មានចេញលក់នៅប្រទេសជប៉ុនហើយ ដោយមានតម្លៃចន្លោះពីប្រមាណ ៤៦ ៧៦២ដុល្លារ ទៅ ៧០ ៥៦៧ដុល្លារ៕
