[ទីផ្សារបរទេស] ក្រុមហ៊ុនផលិតរថយន្ត Toyota បានធ្វើការដាក់បង្ហាញចេញតម្លៃលក់ជាផ្លូវការរបស់រថយន្ត Toyota Grand Highlander ស៊េរីឆ្នាំ ២០២៤ ដែលមានរហូតដល់ទៅ ១០ ម៉ូដែលនៅទីផ្សារសហរដ្ឋអាមេរិកមានដូចជា៖
- XLE ប៉ុង១ តម្លៃលក់ ៤៣ ០៧០ ដុល្លារ (43,070$)
- XLE ប៉ុង២ តម្លៃលក់ ៤៤ ៦៧០ ដុល្លារ (44,670$)
- Limited ប៉ុង១ តម្លៃលក់ ៤៧ ៨៦០ ដុល្លារ (47,860$)
- Limited ប៉ុង២ តម្លៃលក់ ៤៩ ៤៦០ ដុល្លារ (49,460$)
- Platinum តម្លៃលក់ ៥៣ ៥៤៥ ដុល្លារ (53,545$ )
- XLE Hybrid ប៉ុង ១ តម្លៃលក់ ៤៤ ៦៧០ ដុល្លារ (44,670$)
- XLE Hybrid ប៉ុង ២ តម្លៃលក់ ៤៦ ២៧០ ដុល្លារ (46,270$)
- Limited Hybrid តម្លៃលក់ ៥១ ០៦០ ដុល្លារ (51,060$)
- Limited Hybrid Max តម្លៃលក់ ៥៤ ០៥០ ដុល្លារ (54,050$)
- Platinum Hybrid Max តម្លៃលក់ ៥៨ ១២៥ ដុល្លារ (58,125$)
ចំពោះការឌីស្សាញ Grand Highlander ត្រូវបានរចនាឡើងថ្មីប្លែក និងទាក់ទាញ មានប៉ាណាមុខមួយផ្ទាំងធំ ប្រើប្រាស់នៅចង្កៀងមុខប្រភេទ LED ភ្ជាប់ជាមួយមុខងារទម្លើង-ទម្លាក់ដោយស្វ័យប្រវតិ្ត, ថាសកង់ស្ព័រទំហំ ១៨ អ៉ីញ ដល់ ២០ អ៉ីញ, កាង spoiler ជាប់ដំបូលលយចេញមកក្រៅ បំពង់ស៊ីមាំងភ្លោះ, ចង្កៀងក្រោយ LED និងទ្វារក្រោយបើក-បិទដោយថាមពលអគ្គិសនីផងដែរ។
ចំពោះនៅផ្នែកខាងក្នុងវិញ មានបំពាក់កុងទ័រប្រភេទឌីជីថលទំហំ ១២,៣ អ៉ីញ និងអេក្រង់កំសាន្ត touchscreen ទំហំ ១២,៣ អ៉ីញ ភ្ជាប់ដោយមុខងារ Apple CarPlay និង Android Auto និងប្រព័ន្ធ OTA ជំនាន់ថ្មីដែលអាចបញ្ជាដោយសំឡេង, អេក្រង់បង្ហាញលើកញ្ចក់ទំហំ ៧ អ៉ីញ, ឧបករណ៍បំពងសំឡេងម៉ាក JBL ចំនួន ១១ចំនុច, ដំបូលកញ្ចក់បែប Panoramic moonroof, កន្លែងសាកថ្មឥតខ្សែរចំនួន ២ កន្លែង រន្ធUSB ៦កន្លែង, កន្លែងដាក់ដបទឹកចំនួន ១៣ កន្លែង។ លើសពីនេះ ក៏បានភ្ជាប់មកជាមួយប្រព័ន្ធសុវត្ថិភាព Toyota Safety Sense 3.0 ផងដែរ ។
ទាក់ទងនឹងផ្នែកម៉ាស៊ីនវិញ Toyota បានផ្តល់អោយរថយន្តនៅជម្រើសម៉ាស៊ីនចំនួន ៣ជម្រើសគឺ៖
- ម៉ាស៊ីនចំណុះ ២,៤ លីត្រ turbocharged ៤ ស៊ីឡាំង មានកម្លាំង ២៦៥ សេស និងកម្លាំងរមួល ៤២០ ញ៉ូតុនម៉ែត្រ ប្រអប់លេខអូតូ ៨ វគ្គ កម្រិតស៊ីប្រេង ៩-១០ លីត្រ/១០០ គីឡូម៉ែត្រ
- ម៉ាស៊ីនកូនកាត់ Hybrid ចំណុះ ២,៥ លីត្រ ៤ ស៊ីឡាំង ផ្គួបជាមួយម៉ូទ័រអគ្គិសនីមានកម្លាំងសរុប ២៤៥ សេស កម្រិតស៊ីប្រេងត្រឹមតែ ៧ លីត្រ/១០០ គីឡូម៉ែត្រ ។
- ម៉ាស៊ីនកូនកាត់ Hybrid max ចំណុះ ២,៤ លីត្រ ទំហំ ៤ ស៊ីឡាំង មានកម្លាំង ៣៦២ សេស និងកម្លាំងរមួល ៥៤២ ញ៉ូតុនម៉ែត្រ ភ្ជាប់ដោយប្រអប់លេខអូតូ ៦ វគ្គ កម្រិតស៊ីប្រេងចន្លោះពី ៨-៩ លីត្រ/១០០ គីឡូម៉ែត្រ ៕
