[ទីផ្សារបរទេស] ក្រុមហ៊ុន Toyota បានបង្ហាញចេញរថយន្ត Highlander ស៊េរីឆ្នាំ២០២៣ កាលពីដើមឆ្នាំ ហើយពេលនេះក្រុមហ៊ុនបានប្រកាសពីតម្លៃលក់សម្រាប់ទីផ្សារសហរដ្ឋអាមេរិក ដែលនឹងមានចាប់ពី ៣៦ ៤២០ដុល្លារ ឡើងទៅ។
គ្រោងដាក់លក់ចាប់ពីចុងខែតុលានេះ រថយន្ត Highlander ស៊េរីឆ្នាំ២០២៣ មានតម្លៃថ្លៃលើសស៊េរីឆ្នាំ២០២២ ចំនួន ៥៦៥ដុល្លារ ហើយវាមានចំណុចលេចធ្លោត្រង់ការប្រើម៉ាស៊ីនថ្មីប្រភេទ Turbocharged ចំណុះ២,៤លីត្រ ៤ស៊ីឡាំង អាចផលិតកម្លាំងបាន ២៦៥សេះ។
ក្រៅពីម៉ាស៊ីនថ្មីនេះ អតិថិជនក៏មានជម្រើសជ្រើសយក Highlander Hybrid ដែលមានតម្លៃចាប់ពី ៤០ ២២០ដុល្លារ ដោយបំពាក់ម៉ាស៊ីន ២,៥លីត្រ ៤ស៊ីឡាំង ម៉ូទ័រអគ្គិសនីចំនួនមួយនៅខាងក្រោយ និងមានអាគុយចំណុះតូចមួយ។ ម៉ាស៊ីននេះអាចផលិតកម្លាំងបានសរុប ២៤៣សេះ ដោយប្រើប្រព័ន្ធបើកបរប៉ុងពីរ។
ផ្នែកខាងក្រៅរបស់ស៊េរីថ្មីហាក់មិនមានផ្លាស់ប្ដូរទេ ប៉ុន្តែនៅផ្នែកខាងក្នុងមានប្រើប្រាស់ប្រព័ន្ធថ្មីឈ្មោះ Toyota Audio Multimedia ដែលមានអេក្រង់ទំហំ ៨អ៉ីញ និងអេក្រង់ទំហំ ១២,៣អ៉ីញ ដូចដែលមានប្រើលើរថយន្ត Tundra ស៊េរីឆ្នាំ២០២២ ហើយថែមទាំងមានជម្រើសកុងទ័រឌីជីថលថ្មីទំហំ ១២,៣អ៉ីញផងដែរ៕
