[ទីផ្សារបរទេស] ថ្មីៗនេះក្រុមហ៊ុន Toyota បានធ្វើការប្រកាសថាខ្លួននឹងគ្រោងដាក់លក់រថយន្តម៉ូឌែល Innova Hybrid ស៊េរីឆ្នាំ ២០២២ សម្រាប់ទីផ្សារនៅក្នុងប្រទេសឥណ្ឌូនេស៊ី ហើយបន្តចែកចាយទៅកាន់ទីផ្សារអាស៊ីអាគ្នេយ៍មួយចំនួនផ្សេងទៀត នៅខែតុលា ឆ្នាំ២០២២ នេះ។
ចំពោះការឌីហ្សាញនូវរថយន្ត Innova Hybrid បានបំពាក់នូវចង្កៀងមុខ LED, ចង្កៀងក្រោយ រចនារូបរាងថ្មី, ថាសកង់ទំហំ ១៧អ៊ីញ, ដៃទ្វាររថយន្តក្រូម៉េភ្លឺរលោង ភ្ជាប់ជាមួយប៊ូតុង (Lock/Unlock) និងអង់តែងវិទ្យុទម្រង់ជាព្រុយត្រីឆ្លាម (Shark Fin)។
ដោយទ្បែកចំពោះផ្នែកខាងក្នុងនៃរថយន្ត Innova Hybrid បានបំពាក់នូវប្រព័ន្ធកម្សាន្ត DVD ប្រភេទ Touch Screen, ប៊ូតុងបញ្ជាលើចង្កូតរថយន្ត ផ្តល់ភាពងាយស្រួលដល់អ្នកបើកបរ, ប្រព័ន្ធបង្ហាញព័ត៌មាន MID, សោឆ្លាតវៃ (Smart Key) និងការបញ្ឆេះនិងពន្លត់ម៉ាស៊ីនជាមួយប៊ូតុង Start/Stop, កៅអីពូកស្បែកចំនួន៧ ដែលជួរទី២និងទី៣ អាចបត់បែនតាមតម្រូវការ, កៅអីជួរទី២ ប្រភេទ Captain Seat ផ្តល់ភាពងាយស្រួលក្នុងការចេញចូល ទៅកៅអីជួរទី៣ ម៉ាស៊ីនត្រជាក់ មុខក្រោយ ដំណើរការដោយស្វ័យប្រវត្ដិ, ភ្លើងលម្អ LED ពណ៌ខៀវ លក្ខណៈខ្សែបន្ទាត់, ប្រអប់ត្រជាក់ Cool Box សម្រាប់ក្លាសេភេសជ្ជៈ, ជើងទម្រកុំព្យូទ័រ (Sit Back Table), កន្លែងដាក់ដបទឹកឬភេសជ្ជៈ ចំនួន១២កន្លែង និងរន្ធសាកថ្មទូរស័ព្ទ ផ្នែកខាងក្រោយផងដែរ។
បន្ថែមពីនេះរថយន្ត Innova Hybrid ក៏បានបំពាក់នូវប្រព័ន្ធសុវត្ថិភាពរួមមាន៖ ពោងសុវត្ថិភាពចំនួន៩ ចំណុច, កាំមេរ៉ាក្រោយជាមួយ Sensor ២គ្រាប់ ផ្តល់សុវត្ថិភាពក្នុងពេលចូលចំណត, ប្រព័ន្ធបើកបរពេលឡើងចំណោត , ប្រព័ន្ធគ្រប់គ្រងលំនឹង, ប្រព័ន្ធគ្រប់គ្រងទំនាញសកម្ម , ប្រព័ន្ធផ្ដល់សញ្ញាពេលមានអាសន្ន, ប្រព័ន្ធហ្រ្វាំង ABS, ប្រព័ន្ធបែងចែក កម្លាំងសម្ពាធហ្រ្វាំង និងប្រព័ន្ធហ្វាំងជំនួយ ជាដើម។
សូមបញ្ជាក់ថារថយន្ត Toyota Innova Hybrid បច្ចុប្បន្ននេះមិនមានព័ត៌មានបានបង្ហាញអំពីកម្លាំងថាមពល និងតម្លៃនៅទ្បើយទេសម្រាប់ទីផ្សារនៅក្នុងប្រទេសឥណ្ឌូនេស៊ី៕
