ក្រុមហ៊ុន Toyota ត្រូវបានគេរាយការណ៍ថាកំពុងពិចារណាលើម៉ាស៊ីនដើរថាមពលអ៊ីដ្រូហ្សែន សម្រាប់រថយន្ត Prius ជំនាន់ថ្មីដែលជាផ្នែកមួយថ្មីនៃម៉ាស៊ីនប្រភេទ Plug-in Hybrid។
កាលពីប៉ុន្មានសប្តាហ៍មុនទស្សនាវដ្តី Forbes បានរាយការណ៍ថា Toyota បានត្រៀមខ្លួនរួចជាស្រេចក្នុងការដាក់បង្ហាញរថយន្ត Prius ជំនាន់ទី ៥ នៅចុងឆ្នាំ ២០២២។ រថយន្តមួយនេះទំនងជាកូនកាត់សាំង ប៉ុន្តែជម្រើសទីពីរដែលត្រូវបានគេរំពឹងថានឹងមកដល់នៅឆ្នាំ ២០២៣ ត្រូវបានគេនិយាយថានឹងបញ្ចូលម៉ាស៊ីនចំហេះខាងក្នុងអ៊ីដ្រូសែន ផ្គួបជាមួយម៉ូទ័រអគ្គិសនីចំនួនមួយ។ បន្ថែមពីនេះ តាមរបាយការណ៍ថ្មីៗនេះដោយគេហទំព័រ Best Car Web ក៏បាននិយាយអំពីរថយន្ត Prius PHEV ដើរដោយថាមពលអ៊ីដ្រូសែនដែរ ប៉ុន្តែវាអះអាងថាវានឹងមិនលេចចេញជារូបរាងមុនឆ្នាំ ២០២៥ ឡើយ។
ចាប់តាំងពីវាបង្ហាញខ្លួនតាំងពីឆ្នាំ ១៩៩៧ Toyota Prius គឺជាអ្នកត្រួសត្រាយផ្លូវក្នុងបច្ចេកវិទ្យាកូនកាត់។ ទោះយ៉ាងណាក៏ដោយឥឡូវនេះយានយន្តប្រើថាមពលអគ្គីសនីកំពុងក្លាយជាបទដ្ឋានថ្មី ដោយតម្រូវអោយស្វែងរកវិធីផ្សេង ដើម្បីសម្គាល់ខ្លួននៅលើទីផ្សារ ខណៈពេលដែលរក្សាបាននូវការកាត់បន្ថយការប៉ះពាល់បរិស្ថាន។
តាមរយៈការផ្តល់នូវជម្រើសម៉ាស៊ីនកូនកាត់អ៊ីដ្រូហ្សែន សម្រាប់រថយន្ត Prius ជំនាន់ទី៥នេះ គេជឿជាក់ថា Toyota ប្រហែលជារកឃើញនូវវិធីសាស្រ្តដ៏ឆ្លាតវៃដើម្បីរក្សាបាននូវប្រជាប្រិយនៃរថយន្តនេះ បន្ថែមជាមួយការផ្តល់នូវការមិនប៉ះពាល់ដ៏បរស្ថានផងដែរ។ ប៉ុន្តែក៏មានបញ្ហាមួយដែរកើតឡើងផងដែរ គឺកន្លែងចាក់អ៊ីដ្រូហ្សែន ថាតើមានគ្រប់គ្រាន់ឬទេ?
