[បរទេស] រថយន្ត Toyota RAV4 ត្រូវបានកែច្នៃនិងបំពាក់ឈុតតួខ្លួនថ្មីផ្តោតលើរចនាប័ទ្មបើកបរលើផ្លូវពិបាក ឬ Off-Road ដោយក្រុមហ៊ុនកែច្នៃ Kuhl Tuner នៅក្នុងប្រទេសជប៉ុន ហើយត្រូវបានដាក់បង្ហាញជាលើកដំបូងនៅឯ Tokyo Auto Salon 2023 នៅប្រទេសជប៉ុន។
សម្រាប់រថយន្ត Toyota RAV4 VRAVRA Mars by Kuhl បន្ថែមការរចនាពិសេស បំផុសគំនិតដោយរថយន្តយោធា ថែមទាំងមានការកែលម្អប្រព័ន្ធ suspension សម្រាប់ការបើកបរលើផ្លូវពិបាក ឬ Off-Road ទៀតផង។
ឈុតតួខ្លួន VRAVRA Mars ត្រូវបានបំពាក់លើរថយន្ត Toyota RAV4 Adventure Off-Road ជាមួយនឹងលក្ខណៈពិសេសស្រាប់ ប៉ុន្តែ Kuhl បានបន្ថែមនៅភាពធន់ ដោយនៅផ្នែកខាងមុខត្រូវបានរចនាឡើងវិញទាំងស្រុង មានមកជាមួយចង្កៀងមុខ ប៉ាណាត្រូវបានរួមបញ្ចូលគ្នាយ៉ាងទាក់ទាញជាមួយនឹងភ្លើង កាងខាងក្រោមត្រូវបានលាបពណ៌ខ្មៅ ស្រដៀងទៅនឹងរថយន្ត Rezvani ឬ Wranglers ថាសកង់ប្រភេទ Vrarva DW ទំហំ ១៧ អ៊ីញ ស្រោបដោយសំបកកង់ Dunlop Grantrek AT5 all-terrain tire និងត្រឡោកកញ្ចក់ថ្មី។
ផ្នែកខាងក្រោយត្រូវបានកែប្រែយ៉ាងខ្លាំង ដោយកាងខាងក្រោយទំហំធំដែលមានអក្សរ Vrarva នៅកណ្តាល និងកាង spoiler ដែលមានលក្ខណះកាន់តែស្ព័រជាងមុន។ គួរបញ្ជាក់ផងដែរថា សម្រាប់លក្ខណៈពិសេសនៅផ្នែកខាងក្នុងមិនត្រូវបានបង្ហាញនោះទេ។
យោងតាមគេហទំព័រផ្លូវការរបស់ក្រុមហ៊ុនកែច្នៃ Kuhl សម្រាប់ការកែច្នៃនេះមានតម្លៃ ១៦ ៦០៨ ដុល្លារ រួមទាំងពន្ធ ការលាបពណ៌ និងការដំឡើង ។ ក្នុងនោះ ក្រុមហ៊ុនកែច្នៃនេះ ក៏បានផ្តល់ជម្រើសដល់រថយន្ត Toyota RAV4 ប្រភេទប៉ុង ១ ដែលត្រូវបានកែលម្អជាមួយនឹងការធ្វើឱ្យប្រសើរឡើងទាំងអស់ដែលបានរៀបរាប់ខាងលើនឹងត្រូវចំណាយប្រាក់ ៣៣ ២៧៣ ដុល្លារ៕
