ក្រុមហ៊ុន Toyota ចក្រភពអង់គ្លេស បានដាក់ចេញនូវកម្មវិធីធានារយៈពេល ១០ ឆ្នាំ ដែលត្រូវអនុវត្តទាំងលើរថយន្តថ្មី និងមួយទឹក។
កម្មវិធីដែលត្រូវបានគេដាក់ឈ្មោះថា Toyota Relax នេះ នឹងបន្ថែមរយៈពេល ១២ ខែ / ១០០ ០០០ ម៉ាយ៍ រាល់ពេលដែលមានម្ចាស់យករថយន្តមកទទួលសេវាកម្ម នៅមជ្ឈមណ្ឌលផ្លូវការរបស់ក្រុមហ៊ុន Toyota។ ការធានានេះត្រូវបានអនុវត្តដោយស្វ័យប្រវត្តិ ហើយមិនមានការចំណាយបន្ថែមដល់អតិថិជននោះទេ។
វាមានន័យថា ប្រសិនបើអ្នកជាម្ចាស់រថយន្ត Toyota នៅចក្រភពអង់គ្លេស ហើយទទួលយកសេវាកម្មជាប្រចាំនៅឯក្រុមហ៊ុន Toyota នោះវានឹងស្ថិតនៅក្រោមការធានារយៈពេល ១០ ឆ្នាំ ឬរហូតដល់ចម្ងាយ ១០០ ០០០ ម៉ាយ៍ (១៦០ ០០០ គីឡូម៉ែត្រ)។ អ្វីដែលកាន់តែគួរឲ្យចាប់អារម្មណ៍នោះគឺថា កម្មវិធីធានានេះក៏អនុវត្តចំពោះរថយន្ត Toyota មួយទឹកផងដែរ។
ប្រសិនបើអ្នកទិញរថយន្ត Toyota ដែលបានប្រើជាលក្ខណៈឯកជន ឬតាមរយៈក្រុមហ៊ុនចែកចាយ ហើយមិនថាអ្នកជាម្ចាស់ទី២ ទី៣ ឬទី៤ នោះទេ ប្រសិនបើម៉ូដែលនោះមានអាយុតិចជាង ១០ ឆ្នាំ ហើយអ្នកយកវាទៅមជ្ឈមណ្ឌលសេវាកម្ម Toyota អ្នកនឹងទទួលបានការធានា ១២ ខែ / ១០០ ០០០ ម៉ាយ៍ រហូតដល់វាមានអាយុ ១០ ឆ្នាំ៕
