Volkswagen បានបង្ហាញចេញនូវរថយន្ត SUV ខ្នាតតូចថ្មីជាម៉ូដែល Toas ស៊េរីឆ្នាំ ២០២២ ដែលស្ថិតនៅក្រោមរថយន្ត Volkswagen Tiguan មួយកម្រិត។
រថយន្ត Toas នេះមានការឌីហ្សាញដោយមានផ្ទាំងប៉ាណាមុខរាងទូលាយ និងមានអំពូលភ្លើងដែលរាងទាញទៅខាងក្រោយ។ សម្រាប់ Option ខ្ពស់ជាងគេមានបំពាក់នូវភ្លើង LED ដែលភ្លឺចេញពីផ្ទាំងប៉ាណាខាងមុខតែម្ដង។
រថយន្តនេះមានប្រវែង ៤៤៦៥ម.ម ទទឹង ១៨៤២ម.ម កម្ពស់ ១៦៣៦ម.ម និងប្រវែងពីកង់មុខទៅកង់ក្រោយគឺ ២៦៩០ម.ម។ ទំហំនេះគឺធំជាងរថយន្ត Chevrolet Trailblazer និង Kia Seltos ដែលជាគូប្រជែងដ៏ខ្លាំងក្លា។
សម្រាប់ Option ខ្ពស់ជាងគេមានបំពាក់អេក្រង់បញ្ជាទំហំ ៨អ៊ីញ, កន្លែងសាកថ្មទូរសព្ទឥតប្រើខ្សែ និងភ្លើងបំភ្លឺខាងក្នុងចំនួន ១០ជម្រើស។ វាក៏មាននូវ Option សម្រាប់បន្ថែមចង្កូតកម្ដៅ, កៅអីអ្នកបើកបរអាចប្ដូរបាន៨របៀប និងរន្ធបំពងសំឡេងគុណភាពខ្ពស់ចំនួន៨ផងដែរ។
រថយន្ត Toas នេះដំណើរការដោយម៉ាស៊ីន Turbocharged ចំណុះ ១,៥លីត្រ ៤ស៊ីឡាំង កម្លាំង ១៥៨សេះ ភ្ជាប់នឹងប្រអប់លេខអូតូ៨វគ្គ និងប្រើប្រព័ន្ធបើកបរវិលកង់មុខ។ វាក៏មាននូវ Option ប្រព័ន្ធបើកបរវិលកង់ទាំងបួនផងដែរ ប៉ុន្តែប្រអប់លេខត្រូវជំនួសដោយប្រអប់លេខ DSG ៧វគ្គវិញ។
រថយន្ត Toas ស៊េរីឆ្នាំ ២០២២ នឹងចេញលក់នៅសហរដ្ឋអាមេរិកនៅត្រីមាសទី៣ឆ្នាំក្រោយ ហើយតម្លៃវិញរំពឹងថានឹងធូរថ្លៃជាង Tiguan រាប់ពាន់ដុល្លារ ដោយរថយន្ត Tiguan គឺមានតម្លៃចាប់ពី ២៤ ៩៤៥ដុល្លារ៕
