បន្ទាប់ពីជោគជ័យជិតរយៈពេល៤០ឆ្នាំនៅលើទីផ្សារប្រទេសចិន រថយន្ត Volkswagen Santana នឹងត្រូវបញ្ឈប់ការផលិតឆាប់ៗនេះ ដោយវានឹងត្រូវបញ្ឈប់ការផលិតជាមួយរថយន្ត VW Tharu និងរថយន្ត Skoda Rapid ផងដែរ។ នេះបើតាមការចុះផ្សាយរបស់ Automotive News។
រថយន្ត Santana បានប្រកាសចេញនៅប្រទេសចិនក្នុងឆ្នាំ១៩៨៣ ដែលជាការសាកល្បងដំបូងគឺរថយន្តចំនួន១០០គ្រឿងត្រូវបានផ្គុំជាមួយគ្រឿងបន្លាស់មួយចំនួនមកពីប្រទេសអាល្លឺម៉ង។ រយៈពេលបីឆ្នាំក្រោយមក រថយន្ត Santana ទី១ម៉ឺនគ្រឿងត្រូវបានផលិតឡើង រហូតដល់ឆ្នាំ១៩៩៥ គ្រឿងបន្លាស់ជិត ៩០% នៃរថយន្ត Santana បានផលិតឡើងក្នុងប្រទេសចិន។
រថយន្តនេះបច្ចុប្បន្នត្រូវបានដំឡើងនៅរោងចក្រនៃទីក្រុង Yizheng ដែលស្ថិតក្រោមការកាន់កាប់របស់ VW ជាមួយក្រុមហ៊ុន SAIC Motors។ គួរដឹងថា VW មិនបានបញ្ជាក់ពីការបញ្ឈប់ការផលិតរថយន្តនេះទេ ប៉ុន្តែបានទទួលស្គាល់ថារថយន្តប្រភេទ Sedan គឺលែងពេញនិយមទៀតហើយនៅប្រទេសចិន៕
