Tiguan ដែលជារថយន្ត SUV លក់ដាច់បំផុតរបស់ក្រុមហ៊ុន Volkswagen បានទទួលការអាប់ដេតថ្មីជាច្រើន សម្រាប់ស៊េរីឆ្នាំ២០២១ ហើយក្នុងនោះក៏មានបន្ថែមម៉ូដែលថ្មីមួយចំនួនទៀតផងដែរ។
ចាប់ផ្តើមពីផ្នែកខាងក្រៅ វាបានបំពាក់ប៉ាណាមុខថ្មីសន្លាង និងកែកុនចង្កៀងមុខ ស្រដៀងទៅនឹងម៉ូដែល Golf។ មិនតែប៉ុណ្ណោះ វាក៏បានបំពាក់កាងមុខបែបស្ព័រ ដែលមើលទៅរាងកាចជាងមុនទៀតផង។ ចំណែកឯផ្នែកខាងក្រោយវិញ វាបានបំពាក់ចង្កៀងក្រោយថ្មី, យ៉ាន់ឌីហ្សាញថ្មី និងកាងក្រោយថ្មីផងដែរ។
ការអាប់ដេតបានធ្វើឡើងដល់ក្នុងកាប៊ីន ដោយមានបំពាក់ដៃចង្កូតថ្មី ដែលមានកន្លែងប៉ះ និងអូស ដើម្បីបញ្ជាមុខងារផ្សេងៗ។ ជាមួយគ្នានេះ វាបំពាក់កុងទ័រឌីជីថលធំបំផុតដល់ទំហំ ១០,២៥អ៊ីញ និងប្រព័ន្ធភ្លើងបំភ្លឺក្នុងកាប៊ីនសរុប ១៥ពណ៌។
សម្រាប់ទីផ្សារសហរដ្ឋអាមេរិក Volkswagen Tiguan បំពាក់ម៉ាស៊ីនចំណុះ ២,០លីត្រ turbocharged ទំហំ ៤ស៊ីឡាំង មានកម្លាំង ១៨៤សេះ ប្រើប្រអប់លេខអូតូ ៨វគ្គ និងមាន Option ប៉ុងពីរផងដែរ។ រីឯទីផ្សារអឺរ៉ុបវិញ មានបន្ថែមប្រភេទប្រើម៉ាស៊ីន Plug-in Hybrid មានកម្លាំង ២៤២សេះ និងម៉ូដែល Tiguan R ដែលមានកម្លាំងដល់ ៣១៦សេះឯណោះ។ ចំពោះតម្លៃរបស់វានឹងត្រូវប្រកាសនាពេលក្រោយ៕
